ԵԱՀԿ-ն պետք է բազմապատկի ջանքերը՝ ԼՂ հակամարտության լուծման համար. Թուրքիայի ԱԳՆ ղեկավար

Հարավային Կովկասը, Միջերկրական և Սև ծովերի ավազանները միշտ Թուրքիայի համար մեծ նշանակություն են ունեցել: Այդ մասին ադրբեջանական Trend -ին տված հարցազրույցում ասել է Թուրքիայի ԱԳՆ ղեկավար Մևլութ Չավուշօղլուն, ով այցով գտնվել է Բաքվում:

Նա նշել է, որ, ցավոք, այս տարածաշրջանում այնպիսի ձգձգված խնդիրներ կան, ինչպիսին Լեռնային Ղարաբաղի, աբխազական և հարավօսական հակամարտություններն են, որոնք անորոշության աղբյուր են: Չավուշօղլուն ընդգծել է, որ թվարկված խնդիրները սպառնալիք են Եվրասիայի կայունության ու խաղաղության համար:

«Այդ պատճառով էլ համաշխարհային հանրությունը, միջազգային կազմակերպությունները, մասնավորապես՝ ՄԱԿ-ը և ԵԱՀԿ-ն, պետք է բազմապատկեն ջանքերը տարածաշրջանի հակամարտությունների լուծման համար: Իսկ  Թուրքիան հետևում է գործընթացներին ու սատարում Ադրբեջանին»,- ասել է Չավուշօղլուն:

Նրա խոսքով՝ որպես ԵԱՀԿ Մինսկի խմբի անդամ՝ Թուրքիան տարբեր հարթակներում, երրորդ երկրների հետ շփումների ժամանակ միշտ բարձրաձայնում է ԼՂ հակամարտության մասին, որն իր խնդիրն է համարում: