Օրվա հացի փողն են վաստակում, միջին ապրող ընտանիք է. մանրամասներ զոհված զինծառայողի ընտանիքի մասին

Տեղեկացրել էինք, որ փետրվարի 14-ին՝ ժամը 04:40-ի սահմաններում, ՊԲ հյուսիսարևելյան ուղղությամբ տեղակայված զորամասերից մեկի պահպանության տեղամասի մարտական հենակետում մահացու հրազենային վիրավորում է ստացել զինծառայող` 1995թ. ծնված Արման Սերգեյի Օսիպյանը:

20-ամյա Արման Oսիպյանը Գեղարքունիքի մարզի Արտանիշ գյուղից էր: Yerkir.am-ի հետ զրույցում Արտանիշի գյուղապետ Կարեն Շուշանյանը նշեց, որ Օսիպյանն ունի մեկ եղբայր, ով  նույնպես պայմանագրային զինծառայող է` նոր է անցել ծառայության:

«Միջին ապրող ընտանիք է: Հայրն առողջական խնդիրներ ունի, մայրը` նույնպես: Մայրն ընկել էր, ոտքը կոտրվել էր, հիմա նորմալ չի կարողանում քայլել, անընդհատ ցավեր է ունենում: Նրանց հետ է ապրում նաև պապը: Ծնողները մեծ չեն` 40-45 տարեկան: Հայրը չի աշխատում, մորն էլ նոր եմ գյուղապետարանում աշխատանքի դասավորել` հավաքարար է: Օրվա հացի փողն են վաստակում, էլի»,-ասաց գյուղապետը:

Նա տեղեկացրեց նաև, որ քիչ առաջ է վերադարձել Օսիպյանների տնից. ծնողներն արդեն լսել են լուրը, բայց տղայի դին դեռ չի տեղափոխվել Երևան: «Սաղ գյուղն էնտեղ է: Չգիտենք էլ` ինչ անել, ինչ ասել, ոնց մխիթարել»,- ասաց գյուղապետը: