Աշխատող-ապրող ընտանիք էր. 14-ամյա պատանի է ինքնասպան եղել

NEWS.am-ին հայտնի է դարձել, որ Արմավիրի մարզի Խանջյան գյուղում փետրվարի 23-ին 14-ամյա պատանուն ընտանիքի անդամները հայտնաբերել են տանը կից անասնագոմում` պարանով կախված:

Yerkir.am-ի հետ զրույցում Խանջյանի գյուղապետ Սամվել Ավագյանը նշեց, որ անձամբ է ճանաչել պատանուն, իր բարեկամներից է եղել:

«Դպրոցում էր սովորում, 10-րդ դասարան էր: Հայր, մայր, քույր ու եղբայր ունի, երեխաներից մեծն ինքն էր: Նորմալ, աշխատող-ապրող ընտանիք էր: Հայրը համեստ աշխատող մարդ էր, հիմա դաշտերում էտ է անում, ամռանը` Ռուսաստան գնում, մայրն էլ տնային տնտեսուհի է: Իսկ տղան առողջ, աշխույժ երեխա էր, Արմավիր էր գնում` սպորտով զբաղվում»,- ասաց Ավագյանը:

Նա նշեց, որ այնքան զարմանալի էր իրենց համար տղայի այդ քայլը, որ, ինքնասպանության հետ կապված, անգամ վարկածներ չկան գյուղում: Ավագյանը տեղեկացրեց նաև, որ դեպքով ՀՀ ոստիկանությունն է արդեն զբաղվում: