Բողոքի ցույց՝ ընդդեմ Թուրքիայի պետական հեռուստաընկերության

Թուրքիայի ընդդիմադիր Ժողովրդա-հանրապետական կուսակցության անդամները, փոխնախագահ Գյուրսել Թեքինի գլխավորությամբ, բողոքի ցույց են արել Թուրքիայի պետական TRT հեռուստաընկերության շենքի առջեւ:

Ըստ Demokrathaber-ի՝ ցուցարարները հայտնել են, որ «անակնկալ այց» են կատարել TRT: Նրանց հետ հանդիպման է ներկայացել պետական հեռուստաընկերության փոխտնօրեն Էրքան Դուրդուն: Ըստ թուրքական ԶԼՄ-ների՝ Դուրդուն ընդդիմադիր կուսակցականներին հրավիրել է ներս, սակայն նրանք հրաժարվել են, քանի որ գլխավոր տնօրենը չի ներկայացել:

Ցուցարարները հայտնել են, որ հանրապետության գլխավոր դատախազություն հայց են ներկայացնելու TRT-ի դեմ կողմնապահ հեռարձակումներ իրականացնելու պատճառով: «Թուրքիայի հիմնական խնդիրները չեն լուսաբանվում TRT-ի կողմից, կողմնապահություն է արվում»,- ասել է Թեքինը: