Սահմանամերձ Խաչիկի դպրոցը ջեռուցման խնդիր ունի

Սահմանապահ Խաչիկ գյուղի միակ դպրոցի շենքը թեև լիովին վերանորոգվել է, սակայն մի քանի խնդիրներ շարունակում են մնալ չլուծված: Դպրոցի երկու մասնաշենքերը հիմնանորոգվել են 2011-2012 թվականներին Սոցիալական ներդրումների հիմնադրամի կողմից:  

Yerkir.am-ի հետ զրույցում դպրոցի տնօրեն Սամվել Թադևոսյանը հայտնեց, որ թեև ամբողջ շենքը ջեռուցման համակարգով ապահովված է, սակայն ձմռանը ջեռուցումը միացնել չեն կարող` ծախսը բավական մեծ է լինում` ձմռան երեք ամսվա համար պահանջվում է մոտ 6 միլիոն դրամ:

Ներկայումս տաքացվում են միայն դասասենյակները, իսկ միջանցքներում ու մեծ սրահներում ցուրտ է: Եվ միայն դասասենյակները տաքացնելու համար ծախսվում է մինչև 1 միլիոն դրամ:

Չի կահավորվել նաև դահլիճը: Տնօրենն ասաց, որ թեև վերանորոգող կազմակերպությունը խոստացել էր նաև դահլիճը կահավորել, սակայն մինչ օրս այն դատարկ է:

Այնուամենայնիվ, խաչիկցիները գոհ են, որ դպրոցը վերանորոգվել է: Դպրոցի շենքը շահագործման է հանձնվել 1984 թվականին և մինչ վերանորոգումն անմխիթար վիճակում է եղել:

Ներկայումս դպրոցում սովորում է 103 աշակերտ՝ 52 տղա, 51 աղջիկ:  

Նշենք նաև, որ գյուղի պատանիները երկու խմբակ են կարողանում հաճախել՝ պարի և ծանրամարտի: Այս երկու խմբակի պարապմունքներն էլ անցկացվում են գյուղապետարանի շենքում, որը լուրջ վերանորոգման կարիք ունի:

Մանրամասները՝ լուսանկարներում: