Ուղիղ կկրակես, և դա կլինի մեր ստորագրությունը. Դինքին սպանողը խոստովանել է

Պոլսահայ լրագրող, «Ակօս» թերթի խմբագիր Հրանտ Դինքին սպանող Օգյուն Սամասթը հայտնել է, որ Դինքի սպանության մեջ պատասխանատու են երկու նախկին ոստիկանապետեր:

Ըստ Diken-ի՝ Սամասթը Դինքի սպանության «հետևում կանգնած լինելու մեջ» մեղադրել է Տրապիզոնի նախկին ոստիկանապետ Ռամազան Աքյուրեքին և Ստամբուլի ոստիկանության հետախուզության նախկին պետ Ալի Ֆուաթին:

«Նրանք ինձ ստիպել են սպանություն կատարել: Եթե իմ խոսքերի ճշմարտացիությունը բացահայտվի, սպանության հետևում կանգնած մարդիկ կհայտնաբերվեն»,- ասել է մարդասպանը:

Նա խոստովանել է, որ սպանությունը հրահրողներից Յասին Հայալն իրեն վստահեցրել էր, որ «10 տարվա ազատազրկման կենթարկվի, սակայն 4-5 տարուց ազատ կարձակվի»:

Թուրքական DHA-ն Սամասթի ցուցմունքի մասին գրել է նաև, թե նա ասել է. «Նրանք ասացին՝ ուղիղ կկրակես, և դա կլինի մեր ստորագրությունը»:

Հիշեցնենք, որ Սամասթը նոյեմբերի 17-ին նամակ էր գրել Հրանտ Դինքի սպանությունը հետաքննող դատախազին՝ ցանկանալով «կարևոր բան» ասել: Նա դեկտեմբերի 5-ին, որպես վկա, ցուցմունք էր տվել: