Կլինեն գործադուլներ, նստացույցներ և հանրային դատավարություններ. Զարուհի Փոստանջյանը կանխատեսում է

Այսօր Ազատության հրապարակում Րաֆֆի Հովհաննիսյանի կողմից հրավիրված քաղաքացիական ժողովում ելույթ ունեցավ «Ժառանգություն» խմբակցության պատգամավոր Զարուհի Փոստանջյանը:

Նա նշեց, որ Հայաստանին սպասում են դժվարին օրեր` թե' սոցիալական վիճակն է ավելի վատթարանալու, թե' քաղաքական ճգնաժամն է ցայտուն դառնալու: Պատգամավորի խոսքով` քաղաքական ուժերը պետք է իմաստուն որոշում կայացնեն ու համախմբվեն:

«Րաֆֆի Հովհաննիսյանը մի քանի ամիս շարունակ բոլոր միջոցները ձեռնարկեց, որ համախմբումը տեղի ունենա թե' քաղաքական ուժերի, թե' քաղաքացիական հասարակության շրջանում: Ես հավատում եմ, որ այդ գործը կհաջողվի, և հայերը ճգնաժամից պետք է դուրս գան հաղթանակած»,- ասաց Զարուհի Փոստանջյանը` հավելելով, որ իրենց օրակարգի մասին այսուհետ քաղաքացիները իմանալու են հստակ ու վաղօրոք:

«Այլևս չպետք նստենք տանը ու դիտորդի դերում լինենք, այլ պետք է դիմենք գործողությունների: Կլինեն գործադուլներ, նստացույցներ և հանրային դատավարություններ: Երեկվա քվեարկությունն իրապես դավաճանների քվեարկություն էր, և թող որևիցե մեկը չասի, որ իրենից ոչինչ կախված չէր, ովքեր կողմ են քվեարկել, նրանք մեր ազատությանն ու անկախությանն են դավաճանել, իրենք իրենց և իրենց երեխաներին են դավաճանել»,- ասաց նա` հավելելով, որ միայն քաղաքացիներից է կախված, թե մի քանի ամիս հետո ինչպիսին է լինելու Հայաստանը: