Կոնգրեսը դեմ է Օբամայի` միգրանտներին վերաբերող բարեփոխումներին

ԱՄՆ Կոնգրեսի Ներկայացուցիչների պալատն արգելափակել է նախագահ Օբամայի իմիգրացիոն բարեփոխումների ընդունումը: Դրանք հնարավորություն էին տալու 5 մլն ներգաղթյալի խուսափել երկրից արտաքսումից. հայտնում է BBC-ի ռուսական ծառայությունը:

Կոնգրեսականներն ընդունել են նախագահի` Կոնգրեսը շրջանցելով բարեփոխումն իրականացնելու փորձը դատապարտող բանաձեւ, որում ասվում է, որ Օբամայի մի շարք հրամաններ «օրինական ուժ եւ իրավական հետեւանքներ չունեն»:

Սպիտակ տան իրավաբանները, հավանաբար, կհամարեն, որ բանաձեւը հանձնարարական բնույթ ունի, եւ նախագահը կարող է այն անտեսել: Սակայն ընդդիմադիր հանրապետականների հետ սուր տարաձայնությունները, որոնք հունվարից վերահսկելու են Կոնգրեսի երկու պալատները, կարող են դժվարություններ առաջացնել 2015-ի բյուջեի ընդունման հարցում: Հանրապետականները պարզ հասկացրել են, որ թույլ չեն, որ Օբամայի` ներգաղթյալներին վերաբերող նախաձեռնություններն իրականացվեն դաշնային բյուջեի հաշվին: