Ինձ վրա ծառացած բեռ կար, դա թողեցի հանդիսատեսին. թուրք ռեժիսորը՝ ֆիլմի մասին

Արդեն տեղեկացրել ենք, որ Թուրքիայում կայացել է Ֆաթիհ Աքընի Հայոց ցեղասպանության մասին «Հատումը» ֆիլմի պրեմիերան:

Այս մասին «Ակօս»-ը գրել է.

«Աղետների մասին պատմելը դժվար է: Սակայն ավելի դժվար է ականատես եղածների կամ ականատեսների պատմածները լսածների, լսածները յուրացրածների համար` աղետների մասին պատմելը: Լինում է այնպես, չէ՞, երբ մարդ ողջ մերկությամբ ձեզ ցույց է տալիս այն, ինչը դուք արդեն գիտեք կամ, իմանալով հանդերձ, դրա վրա աչք եք փակում: Ինչպես որ «Հատումը» ֆիլմը…

Մենք («Ակօսը») հանդիսատեսի հետ քննարկեցինք ֆիլմն ու հիշատակեցինք Հայոց ցեղասպանության ականատեսների՝ Հակոբ Օշականի, Դանիել Վարուժանի և Զաբել Եսայանի անունները: Վերջինս գրել էր. «Եթե արյուն-կրակով խելքը կորցրած այս մարդկանց ապրածները կարողանամ ներկայացնել, ես հայրենիքի հանդեպ պարտքը կատարած կլինեմ»: Բոլորին հետաքրքրում էր` ֆիլմը Թուրքիայում կցուցադրվի՞, թե՞ ոչ: Աքընն ասել էր, որ «Թուրքիան դրան պատրաստ է»:

Այդ ֆիլմի նկարահանման վրա 7 տարի աշխատած Աքընին հարցրեցինք այդ օրվա իր զգացմունքների մասին, ասաց. «Երկար ժամանակ կաշխատես և մի օր մի պահի համար կաշխատես: Կգա այդ օրն, ու դու դատարկություն կզգաս… Եվ այսօր իմ ներսում դրական դատարկություն է, հանգստություն… Ինձ վրա ծառացած բեռ կար, դա թողեցի հանդիսատեսի ուսերին»:

«Մեզ մնում է այդ բեռը վերցնել»,- հավելում է «Ակօս»-ը: