Հայ-թուրքական սահմանի հարցով թուրքերն զգուշացնում են Հռոմի պապին

Ըստ Haberler-ի՝ Թուրքիայում երիտասարդության եւ սպորտի կոնֆեդերացիայի փոխնախագահ Ալփայ Գյուրելը պատասխանել է Ֆրանցիսկոս պապի՝ հայ-թուրքական սահմանի մասին հայտարարությանը:

Հերթական անգամ պնդելով, որ Հայաստանն «օկուպացրել» է «ադրբեջանական հող» Ղարաբաղը, փոխնախագահն ասել է. «Մենք իսկապես ուրախ ենք Հռոմի պապի՝ Թուրքիա կատարած այցի համար, սակայն Ֆրանցիսկոս պապը թող հասկանա, որ պետք է կոչ անի ոչ թե Անկարային, այլ Երևանին: Այնքան ժամանակ, որքան Հայաստանը շարունակում է օկուպացնել Ղարաբաղը և դրա արդյունքում վնասներ կրած Ադրբեջանի քաղաքացիներին չհատուցել, հայ-թուրքական սահմանը չի բացվելու: Երբ վերջ տա Ղարաբաղն օկուպացնել` կարող է Թուրքիայից լավ հարևանություն ակնկալել: Հակառակ դեպքում` այն խիստ վրդովմունք կառաջացնի թուրք երիտասարդության շրջանակում»:

Հիշեցնենք, որ Հռոմի պապը Թուրքիա կատարած եռօրյա այցից հետո ասել էր, որ «երանի հայ-թուրքական սահմանը բացվի»: