Ավարտվեց հերթական քաղաքական աշունը, որն այդպես էլ չթեժացավ. Շարմազանով

Ավարտվեց հերթական քաղաքական աշունը, որը նախորդ աշուններից առանձնապես չտարբերվեց եւ այդպես էլ չթեժացավ. ԱԺ հայտարարությունների ժամին ելույթում նշեց ԱԺ փոխնախագահ Էդուարդ Շարմազանովը: «Ի տարբերություն իշխանությունների, քաղաքական որոշ ուժեր այդպես էլ չձեւավորեցին թե՛ ներքին, թե՛ արտաքին քաղաքական միասնական օրակարգ»,- ասաց նա:

Անդրադառնալով ԵՏՄ-ին Հայաստանի անդամակցությանը` Շարմազանովը հայտարարեց, որ այդ միությանն անդամակցելը դրական է եւ բխում է պետության շահերից: «Ավելին՝ թե՛ որոշ ընդդիմադիր առաջնորդների հրապարակային հայտարարությունները, թե՛ գլխադասային հանձնաժողովում հարցի քննարկումներն ու քվեարկությունը ցույց տվեցին, որ խորհրդարանում առկա քաղաքական ուժերի մեծամասնությունը կողմ է իշխանությունների այս որոշմանը, այդ թվում` նաեւ այն ուժերը, որոնց ներկայացուցիչները 2013 թվականի սեպտեմբերի 3-ից հետո, իրար հերթ չտալով, փորձում էին քննադատել մեզ»,- նշեց նա:

Հայոց ցեղասպանության 100-ամյա տարելիցին ընդառաջ Թուրքիայից հնչող ազդակներն էլ, ըստ Շարմազանովի, գալիս են ապացուցելու, որ Թուրքիան շարունակում է ժխտողականության քաղաքականությունը: «Դրա վկայությունն է Թուրքիայի արտգործնախարար Մեւլութ Չավուշօղլուի` վերջերս արած հայտարարությունը, համաձայն որի՝ Թուրքիան խոչընդոտելու է Ցեղասպանության ճանաչման գործընթացին: Չնայած նրանց գործադրած ջանքերին՝ այնուհանդերձ, կան եւ կլինեն երկրներ, որոնք հանդիսանում են մարդու իրավունքների պաշտպանության իրական ջատագովներ: Վառ ապացույցը Բոլիվիան է, որի խորհրդարանի զույգ պալատների կողմից նախօրեին միաձայն դատապարտվեցին Հայոց ցեղասպանությունը եւ այն ժխտող քաղաքականությունը: Համոզված եմ, որ մարդկության դեմ իրագործված ոճիրները պետք է դատապարտվեն, քանի որ ժխտողականությանը միտված ցանկացած գործողություն նույնքան հանցավոր է, որքան ոճրագործությունը»,- եզրափակեց ԱԺ փոխնախագահը: