«Բագրատ տուր» ՍՊԸ-ի ուղղությամբ արձակված կրակոցների դեպքի առթիվ քրեական գործ է հարուցվել

Նոյեմբերի 17-ին` ժամը 04:20-ի սահմաններում, անհայտ անձինք կրակել են Սարյան փողոցում գտնվող` Բագրատ Նավոյանին պատկանող «Բագրատ տուր» տուրիստական ընկերության գրասենյակի ուղղությամբ և դիմել փախուստի:

Yerkir.am-ի տեղեկություններով` դեպքի վայրը և դրան հարակից տարածքները նկարահանող տեսախցիկները ֆիքսել են կրակոցներ արձակելու պահը, իսկ այժմ քննչական մարմինն աշխատանքներ է իրականացնում դեպքի ժամանակահատվածի տեսագրությունները ձեռք բերելու համար:

ՀՀ քննչական կոմիտեից yerkir.am-ը տեղեկացավ, որ  դեպքի առթիվ հարուցվել է քրեական գործ` ՀՀ քրեական օրենսգրքի 185-րդ հոդվածի 1-ին մասով և 235-րդ հոդվածի 1-ին մասով: Կատարվում է նախաքննություն: Նշանակվել է դատաձգաբանական, դատաքիմիական և ապրանքագիտական համալիր փորձաքննություն, որի եզրակացությունը դեռևս չի ստացվել:

Նախաքննության ընթացքում դեպքի հանգամանքները պարզելու և հանցագործությունը բացահայտելու ուղղությամբ օպերատիվ-հետախուզական միջոցառումներ ձեռնարկելու համար կոնկրետ հանձնարարություն է տրվել ոստիկանության բաժնին: