Եթե դու նեղացածի կերպար ես ընդունում, դա մարգինալության նշան է. Շարմազանով

Այսօր լրագրողների հետ զրույցում ԱԺ փոխխոսնակ Էդուարդ Շարմազանովը, անդրադառնալով ԱԺ նախագահի մոտ բոլոր խմբակցությունների մասնակցությամբ կայացած քննարկմանը, որի ընթացքում քննարկվել է վարչապետի առաջարկը, նաև խոսելով այն մասին, որ եռյակը հրաժարվել է բովանդակային քննարկումների մասնակցել` այդ առաջարկի հետ կապված, ասաց. «Քաղաքական երկխոսության մերժումը դրական երեւույթ չէ: Առհասարակ, երկխոսությունը մերժում են նրանք, ովքեր ասելիք եւ անելիք չունեն քաղաքական դաշտում: Մերժումը մարգինալների գործելաոճն է»:

Նրա համոզմամբ` լուրջ քաղաքական ուժը, որը մտահոգված է երկրում բարեփոխումների իրականացմամբ, ոչ թե սեփական փոքր դերակատարումն է ցանկանում ավելացնել, պետք է գնա երկխոսության: «Երկխոսությունը նրա համար է, որ իշխանությունն ու ընդդիմությունը մոտեցնեն իրեն տեսակետերը` հասարակության խնդիրները լուծելու համար: Եթե դու ուլտիմատումներ ես ներկայացնում, նեղացածի կերպար ես ընդունում` դա մարգինալության նշան է»,- ասաց ԱԺ փոխխոսնակը: