Գլխավոր դատախազն ու վերաքննիչ դատարանը կսաստե՞ն անկախ հանձնաժողովին

ՀՀ ԱՆ «Կոշ» ՔԿՀ-ի դատապարտյալ Ռուբեն Ամատունին դեմել է ՀՀ վերաքննիչ քրեական դատարան` բողոքարկելով Արագածոտնի մարզի ընդհանուր իրավասության դատարանի նոր որոշումը:

Նշենք, որ նույն դատարանը ամիսներ առաջ կալանավորի օգտին վճիռ էր կայացրել` վերացնել ՔԿՀ-ի վարչական հանձնաժողովի` նրա պայմանական վաղաժամկետ ազատ արձակման դիմումը մերժելու մասին` 31.04.2014թ. որոշումը և պարտավորեցնել Ամատունուն վաղաժամկետ ազատելու միջնորդությունը ներկայացնել անկախ հանձնաժողովին:

Սակայն, հակառակ կալանավորի սպասումների, հանձնաժողովը մերժել էր նրան: Ամատունին, օգտվելով հանձնաժողովի որոշումները բողոքարկելու` օրենքով տրված հնարավորությունից կրկին դիմել էր Արագածոտնի մարզի դատարան: Սակայն դատավոր Սուրիկ Մնոյանը մերժել էր նրան:

Yerkir.am-ին դիմած դատապարտյալը հույս հայտնեց, որ վերաքննիչ դատարանը կնկատի բողոքի մեջ նշված այն հանգամանքը, որ անկախ հանձնաժողովի որոշումները բողոքարկելի են դատական կարգով` օրենքին հակասելու դեպքում, և արդար որոշում կկայացնի:

Նշենք, որ Ամատունին վերջերս էլ դիմել էր ՀՀ գլխավոր դատախազ Գևորգ Կոստանյանին` խնդրելով վերահսկել անկախ հանձնաժողովին: