«Ինչպե՞ս բարեփոխել Սահմանադրությունը». ամփոփվեցին ուսանողական մրցույթի արդյունքները

Սահմանադրությունը, լինելով մեր երկրի ու հասարակության հիմնական ինստիտուտները կարգավորող փաստաթուղթ, պետք է լինի զարգացող օրգանիզմ. ասաց արդարադատության նախարար Հովհաննես Մանուկյանը «Ինչպե՞ս բարեփոխել Սահմանադրությունը» թեմայով համապետական ուսանողական մրցույթի  արդյունքների ամփոփմանը նվիրված միջոցառման ժամանակ:   

Նախարարը ողջույնի խոսքում ասաց, որ սահմանադրական բարեփոխումներն իր համար ունեն նաև զգացմունքային նշանակություն, քանի որ Սահմանադրության «ծնունդին» մասնակից է եղել: Ըստ նրա` իր համար շատ հաճելի է, որ անձանց  իրավունքների պաշպանության  արդյունավետ մեխանիզմների  ստեղծման պրոցեսին մասնակից է դառնում  երիտասարդ սերունդը, մասնավորապես` ուսանողությունը:

Այնուհետև պատվավոր հյուրերի և կազմակերպիչների կողմից հանձնվեցին մրցանակներ հաղթող ուսանողներին:  Մրցանակներ էին նախատեսվել 1-3 տեղերի համար, նաեւ` 2 հատուկ մրցանակ: Հաղթողների համար մրցույթի կազմակերպիչ  AM իրավաբանական ընկերությունը  պատրաստել էր համակարգիչներ, ինչպեսև հնարավորություն 3 ամիս աշխատելու իրենց իրավաբանական ընկերությունում:

Մրցանակներ հանձնեցին արդարադատության նախարար Հովհաննես Մանուկյանը, Սահմանադրական բարեփոխումների մասնագիտական հանձնաժողովի անդամ Գևորգ Դանիելյանը,  ԵՊՀ միջազգային ամբիոնի վարիչ Վիգեն Քոչարյանը, Սահմանադրական դատարանի նախագահի ավագ խորհրդական Անահիտ Մանասյանը և այլք:

Մրցանակաբաշխության վերջում  եղան   մասնագիտական քննարկումներ և թեմատիկ ելույթներ: