Մենք գնում ենք ու սկսում ենք, դուք գալի՞ս եք. Արամ Մանուկյանը՝ վանաձորցիներին

Վանաձորում երեք ուժերի կողմից հրավիրված հանրահավաքում ելույթ  ունեցավ ՀԱԿ խմբակցության քարտուղար Արամ Մանուկյանը: Նա հայտարարեց, որ և' լավ խոսքեր է ասելու, և' դառը:

«Լոռեցիներն ուշ են արթնանում, բայց որ արթնանում են, չեն ուզում քնել: Ուզում եմ ամոթանք տալ վանաձորցիներին. Գյումրին,  Սևանն ու Գավառը կանգնած են ու ըմբոստանում են շրջանառության հարկի դեմ, բա դուք ո՞ւր եք, դուք համաձա՞յն եք, որ մեզ ապուշի տեղ են դրել»,- հարցրեց Արամ Մանուկյանը` հավելելով, որ վանաձորցիները շատ են համբերատար, հեզ, խելոք ու տանում են իշխանության պատճառած նեղությունները:

«Ինձ թվում ա Ղարաքիլիսան մեր պապերը չեն հաղթել: Ինչո՞ւ եք խեղճացել, ո՞ւմ առաջ եք խեղճացել: Գլուխներդ  ձիգ պահելու փոխարեն դուք գնում եք երկրից: Ո՞նց կլինի էսպես, ե՞րբ պետք է ուղղեք ձեր ողնաշարը ու մի երկու հոգու քշեք էս երկրից: Թանկացել է ամեն ինչ` հոսանքը, գազը, ուսման վարձը, բան կա՞, որ չի թանկացել: Մեզ փորձության են ենթարկում, ասում են`  սեղմելու ենք մինչև վերջ: Իսկ խեղճությունը խեղճություն է բերելու,  բայց կա նաև հակառակը` ըմբոստությունը ըմբոստություն է բերելու: Ոտքի ելեք,  ամոթ ա: Եկեք, երկրին տեր կանգնեք, լոռեցինե'ր: Հրանտ Մաթևոսյանն ասում էր` եղունգի չափ խելք ունեցողը հեծնել ա ու տիրում ա, բայց նույն Հրանտն էր ասում, որ` մի թող քեզ վախեցնեն ու վախեցնողի աչքը հանի: Եթե այսպես շարունակվի, Հայաստանը կարող է դառնալ փոքր գավառ, ուր հայը տեղ չունի: Կամ պետք է ասել` հերիք ա,  բոլ ա, ռադներդ քաշեք, կամ էլ սպառվելու ենք ու  ոչնչանանք: Մենք գնում ենք ու սկսում ենք, դուք գալի՞ս եք: Ով չեկավ,  ամոթ նրան: Եկեք ու տեր կանգնեք»,- ասաց Արամ Մանուկյանը: