Ի՞նչ է, մտածում եք` մեր ուժը չէ՞ր հերիքում հայհոյել. ՀՀԿ-ական

ԱԺ ՀՀԿ խմբակցության ղեկավար Վահրամ Բաղդասարյանը համոզված է, որ երկրում իշխանափոխության համար հիմքեր չկան, և ժողովուրդը շատ շուտով կհիասթափվի ոչ իշխանական ուժերի հանրահավաքներից, որովհետև ելույթ ունեցող ընդդիմադիրների ասելիքը 1-15 րոպեի ընթացքում սպառվում է: Այս մասին Բաղդասարյանն ասաց ԱԺ ավանդական ճեպազրույցում եւ անդրադարձավ Արամ Մանուկյանի` աղմուկ հանած ելույթին:

«Ի՞նչ է, մտածում եք` մեր ուժը չէ՞ր հերիքում, որ հարթակից երկրի առաջին դեմքերին հայհոյող, ալկոհոլ օգտագործած մարդկանց և' անձնապես հայհոյենք, և' խոսափողով հայհոյենք, բայց մենք չենք իջնի այդ մակարդակին»,- ասաց նա:

Լրագրողների այն դիտարկմանը, որ ՀՀԿ պատգամավորներն  ալկոհոլ օգտագործած վիճակում արդեն եղել են խորհրդարանում` քվեարկելով ու վճռելով մարդկանց ճակատագրեր, Վահրամ Բաղդասարյանը պատասխանեց, թե ինքը դատապարտում է նման երևույթները` անկախ այն բանից, թե որ կուսակցությունից է:

Նա նաև զարմացավ այն հարցից, որ «Ֆեյսբուք»-ում տարածվել է մի տեսանյութ, որում մի երիտասարդ այրում է իր` ՀՀԿ-ականի տոմսը: Բաղդասարյանը, որպես հակափաստարկ, նշեց, որ հազարավոր երիտասարդներ անդամագրվում են ՀՀԿ-ին: «Նման շոուներին մի' հավատացեք»,- ասաց նա` հավելելով, որ դա սարքած է, ոչ թե` իրական: