Եգիպտոսում սահմանադրական հանրաքվե է անցկացվում

Այսօր Եգիպտոսում անցկացվում է Սահմանադրության մեջ ուղղումներ մտցնելու վերաբերյալ համաժողովրդական հանրաքվե. տեղեկացնում է France Press գործակալությունը:

Ընդհանուր առմամբ, քվեարկությանը կմասնակցի 45 մլն մարդ, որոնք պետք է որոշեն Սահմանադրության 8 հոդվածներում փոփոխություն կատարելու և մեկ հոդված չեղյալ հայտարարելու հարցը։

Մասնավորապես՝ նախատեսվում երկիրը նախագահելու 6–ամյա ժամկետը 4 տարի դարձնելու փոփոխություն, նաեւ միայն մեկ անգամ վերընտրվելու իրավունք։

Նոր ուղղումները պահանջում են, որ նախագահի թեկնածուն, բացի եգիպտականից, այլ քաղաքացիություն չունենա և ամուսնացած չլինի օտարերկրացու հետ։

Նախատեսվում է նաև չեղյալ համարել Սահմանադրության 179–րդ հոդվածը, որը ահաբեկչության սպառնալիքի դեպքում նախագահին օժտում է հատուկ լիազորություններով։

Հանրաքվեի արդյունքում կփոխվի երկրում վերջին 30 տարիներին գործող արտակարգ դրություն մտցնելու գործընթացը. արտակարգ դրություն մտցնելը կմտնի խորհրդարանի լիազորությունների մեջ, ընդ որում՝ այն ուժի մեջ կլինի առավելագույնը 6 ամիս, հակառակ դեպքում՝ իշխանությունները ստիպված կլինեն այդ հարցով համաժողովրդական հանրաքվե անցկացնել։

Ի դեպ, առաջարկված փոփոխությունները ստացել են «Մուսուլման եղբայրների», ինչպես նաև նախկինում իշխող Ազգային-դեմոկրատական կուսակցության աջակցությունը։ Նրանց կարծիքով՝ ուղղումներից հրաժարվելը կերկարաձգի անցումային շրջանը և կբարդացնի երկիրը կառավարելու՝ բանակի խնդիրը։

Երկրում ներկայումս իշխող Ռազմական ուժերի գերագույն խորհրդի ծրագրի համաձայն՝ հանրաքվեն կլինի իշխանությունը ժողովրդավարական ճանապարհով ընտրված քաղաքացիական ղեկավարությանը փոխանցելու առաջին քայլը։