Դե, մեր լուրջ քննարկման թեման Ուկրաինայի ու Ռուսաստանի միջև հարաբերությունները չեն. ի՞նչ են այդքան քննարկում Լիսկան ու Կովալը

Սյունիքի նախկին մարզպետ Սուրիկ Խաչատրյանին ու Կոտայքի նախկին մարզպետ, ներկայումս վարչապետի խորհրդական Կովալենկո Շահգալդյանին հաճախ կարելի է տեսնել միասին Երևանի կենտրոնական սրճարաններում կամ պարզապես զբոսնելիս, ինչ-որ բան քննարկելիս: Երկու նախկին մարզպետները պարզապես մտերի՞մ են, թե՞ լուրջ խնդիրներ ունեն` քննարկելու:

Yerkir.am-ի այս հարցը Կովալենկո Շահգալդյանը համարում է «անձնական հարաբերություններին ուղղված հարց»: «Մենք մտերիմ ընկերներ ենք վաղուցվանից և, բնականաբար, հաճախ հանդիպում ենք: Հազարավոր մարդիկ մտերիմ են միմյանց հետ ու դրա մեջ վատ բան չկա… Դե, մեր լուրջ քննարկման թեման Ուկրաինայի ու Ռուսաստանի միջև հարաբերությունները չեն»,- ասաց Շահգալդյանը:

Ի դեպ, մեր հարցին` գուցե Սուրիկ Խաչատրյանի` իշխանություն վերադառնալու հա՞րցն են քննարկում, վարչապետի խորհրդականը պատասխանեց. «Ես դրա հետ ոչ մի կապ չունեմ»:

Սուրեն Խաչատրյանը, ով, մեր տեղեկություններով, լծված է իշխանական որեւէ պաշտոնի վերադառնալու գործին, այդպես էլ մեր հեռախոսազանգերին չպատասխանեց: