110 մլն դրամ` Կոմիտասի և Քարվաճառի մասին ֆիլմ նկարահանելու համար

ՀՀ կառավարության այսօրվա նիստում որոշվել է «Վարդապետի լռությունը» պայմանական անվանմամբ և «Քարվաճառ» լիամետրաժ խաղարկային կինոնկարների ստեղծման նպատակով մշակույթի նախարարությանը 2014-ի ինն ամսում հատկացնել 110 մլն դրամ: Մշակույթի նախարարությունն էլ, իր հերթին, գումարը փոխանցելու է Հայաստանի ազգային կինոկենտրոնին` ֆիլմերը կյանքի կոչելու համար:

«Վարդապետի լռությունը» ֆիլմը հայ երաժշտարվեստի նահապետ Կոմիտաս Վարդապետի կերպարն առավել խորությամբ և բազմակողմանի բացահայտելու և ժողովրդականացնելու փորձ է լինելու: Ֆիլմի ռեժիսորը Վիգեն Չալդրանյանն է: Կինոնախագիծը բացառիկ է իր բնույթով, քանի որ Կոմիտասին նվիրված լիամետրաժ խաղարկային կինոնկար մինչ օրս չի ստեղծվել: Նախագիծը առանձնահատուկ հնչեղություն է ստանում նաև Հայոց ցեղասպանության 100-ամյա տարելիցին նվիրված ծրագրերի համատեքստում:

Իսկ «Քարվաճառ» (պրոդյուսեր՝ Թաղի Ալիղոլիզադեհ, բեմադրող ռեժիսոր՝ Անահիտ Աբատ) խաղարկային լիամետրաժ կինոնախագծի առանձնահատկությունն այն է, որ այն ստեղծվում է Իրանում, և ստեղծագործական մտահղացման նախաձեռնողներն իրանցիներ են։ Հատկանշական է, որ այլ երկրի արվեստագետն ու մտավորականն է փորձում տեսնել Արցախի իրական կյանքը, ազատատենչ արցախցու ինքնուրույն կյանք վարելու իրավացի պահանջը։