Բաքվի շուկայում չենք գտնվում. Ադրբեջանի հայտարարությունը գռեհիկ ապատեղեկատվություն է

ՀՀ ՊՆ մամուլի խոսնակ Արծրուն Հովհաննիսյանը ֆեյսբուքայն իր էջում գրել է. «Դեռևս Բաքվի շուկայում չենք գտնվում և առևտրով չենք զբաղվում։ Մենք խստորեն պահպանում ենք մարդասիրական հումանիտար սկզբունքները և նախապայմաններ չենք ներկայացնում ու ընդունում։ Ուղղակի հարգելով Կարմիր խաչի կազմակերպության ջանքերը այդ ուղղությամբ պարբերաբար դիմում ենք վերջինիս աջակցությանը ՀՀ և ԼՂՀ քաղաքացիների վերադարձը կազմակերպելու համար։ Ադրբեջանի տվյալ պաշտոնյայի հայտարարությունը գռեհիկ ապատեղեկատվություն է»:

Հիշեցնենք, որ Ադրբեջանական լրատվամիջոցները հայտարարել են, թե, իբր, Ադրբեջանի ՊՆ-ն առաջարկել է ՀՀ ՊՆ-ին Ադրբեջանում պահվող հայկական ընտանիքի անդամների և Կարեն Պետրոսյանի դիակի փոխանակումն իրականացնել` հայկական կողմից պահանջելով դիվերսիոն անհաջող փորձի ժամանակ ձերբակալված երկու դիվերսանտների եւ մեկ դիվերսանտի դին, սակայն հայկական կողմը հրաժարվել է: