«Ֆարմատեք» ՓԲԸ-ին «Ալյանս» ազատ տնտեսական գոտում շահագործողի թույլտվություն կտրամադրվի

Կառավարությունը վաղը «Ֆարմատեք» ՓԲԸ-ին «Ալյանս» ազատ տնտեսական գոտու «ՌԱՕ Մարս» ՓԲԸ-ի տարածքում 3 տարի ժամկետով ու երկարաձգելու հնարավորությամբ շահագործողի թույլտվություն կտրամադրի` դեղագործական գործունեության իրականացման համար:

«Ալյանս» ազատ տնտեսական գոտում շահագործողների գործունեությունը, համոզված են կառավարությունում, հնարավորություն կընձեռի ներգրավել ներդրումներ, նպաստել տվյալ հատվածում հայկական բրենդի ճանաչմանն ու տարածմանը:

«Ֆարմատեք» ՓԲԸ-ն զբաղվում է դեղորայքի, դեղագործության մեջ կիրառվող պարագաների արտադրությամբ, դեղագործական սարքավորումների մոդելավորմամբ և հավաքմամբ, լոգիստիկ պահեստային ծառայությամբ: Ուստի ընկերության'ազատ տնտեսական գոտի մուտքը և գործունեությունը նպատակաուղղված է ավելացված արտադրական հզորությունները շահագործելուն, սեփական ապրանքատեսականին ընդլայնելուն' ներառելով նոր դեղաձևեր, գործունեության նոր գաղափարներ ներկայացնելուն:

Ըստ կառավարության հաստատմանը ներկայացվելիք որոշման նախագծի' «Ֆարմատեք» ՓԲԸ ԱՏԳ-ում գործունեության առաջին 5 տարիների ընթացքում ընկերության հաստիքացուցակը կավելանա' հասնելով 94 աշխատակցի, իսկ պլանավորված աշխատավարձի մակարդակը կլինի շարունակական միջինից բարձր:

«Ընկերությունը արդեն կատարել է  մոտ 1,2 մլն եվրոյի ներդրում սարքավորումների և «մաքուր տարածքների» մեջ' նպատակ ունենալով ընդլայնելու ներկայիս ապրանքատեսականին' ներառելով աչքի կաթիլներ և հաբեր: Նախատեսվում է կատարել 4,5 մլն եվրոյի ներդրում ներարկման դեղամիջոցների արտադրության կազմակերպման մեջ»,- նշում է կառավարությունը:

Կառավարությունը համարում է, որ  «Ֆարմատեք» ՓԲԸ-ի կողմից ներկայացված հայտը համապատասխանում է ՀՀ կառավարության համապատասխան որոշմամբ սահմանված պահանջներին' գործարար ծրագիրը գնահատվել է 90 միջին միավոր (անցողիկ շեմ' 60 միավոր), ուստի կառավարությունը նպատակահարմար է գտնում թույլատրել «Ֆարմատեք» ՓԲԸ-ին «Ալյանս» ազատ տնտեսական գոտում շահագործողի կարգավիճակով գործունեություն ծավալելը: