Ըմբշամարտ. Զավեն Միքայելյանը Նանկին է մեկնում պատվո պատվանդանին կանգնելու վճռականությամբ

Օգոստոսի 16-28-ը Չինաստանի Նանկին քաղաքում ընթանալու են ամառային պատանեկան օլիմպիական 2-րդ խաղերը, որի ծրագրում տեղ գտած մարզաձևերից 8-ում պատրաստվում են մասնակցել նաև Հայաստանի 14 պատանի մարզիկներ:

 ՀԱՕԿ-ի լրատվական ծառայությունը ներկայացնում է նրանցից մեկին` հունահռոմեական ոճի 58 կգ քաշային կարգի ըմբիշ, պատանիների Եվրոպայի փոխչեմպիոն Զավեն Միքայելյանին: Իր քաշի համեմատ բարձրահասակ, նիհարավուն ըմբիշ է 17-ամյա Զավեն Միքայելյանը (58 կգ), սակայն խաբուսիկ է նրա արտաքինը, քանզի ունի ուժեղ մկանախմբեր: Հունահռոմեական ոճի ըմբշամարտի Հայաստանի պատանեկան հավաքականի ավագ մարզիչ, վաստակավոր մարզիչ Գագիկ Խաչատրյանը զրույցի ժամանակ ասաց, որ Զավենը Նանկինում օգոստոսին կայանալիք պատանեկան օլիմպիական խաղերի ուղեգիրը նվաճեց Եվրոպայի` այս տարվա առաջնությունում, որտեղ գրավեց երկրորդ տեղը:

Զավենը Էջմիածնի շրջանի Արտիմեդ գյուղի բնակիչ է: Նրա անձնական մարզիչն է վաստակավոր մարզիչ Սամվել Գևորգյանը: Պատանին գրոհային ոճի ըմբիշ է: Սիրում է կանգնած դիրքից, արագության ներքո կատարել փոխադրում հնարքը և այդ կերպ ճնշել մրցակիցներին: Հունահռոմեական ոճի ըմբիշը տասնյակ դասական այլ հնարքների է տիրապետում: Սակայն նա ունի նաև թերություն. չի կարողանում իր կուռ մկանախմբերը համախմբել: Օրինակ` միայն գոտկատեղի ուժով է փորձում կատարել պոկում հնարքները, և սա նրան թուլացնում, հոգնեցնում է: Թերությունը շտկելու ուղղությամբ մարզիչներն աշխատել են այս մրցաշրջանում արդեն կայացած ուսումնամարզական հինգ հավաքներում: Հայաստանի պատանեկան հավաքականը շուտով կմեկնի Սլովակիա՝ աշխարհի առաջնությանը մասնակցելու: Զավենը կմնա տանը և անձնական մարզչի ղեկավարությամբ կշարունակի հղկել մասնագիտական գործողությունները:

Զավեն Միքայելյանը Հայաստանի ազգային օլիմպիական կոմիտեի պատվիրակության կազմում Նանկին կմեկնի պատվո պատվանդանին կանգնելու վճռականությամբ: