ՕԵԿ-ը գին է թանկացնում

ԱԺ ԲՀԿ խմբակցության պատգամավոր Վահան Բաբայանը, նկատի ունենալով այն հանգամանքը, որ քաղաքականության մեջ ոչինչ չի կարելի բացառել, չի բացառում նաև, որ  ՕԵԿ-ը կցանկանա դառնալ ընդդիմություն: Yerkir.am-ի հետ զրույցում, պատասխանելով այն հարցին` կընկալվի՞ արդյոք ժողովրդի կողմից ՕԵԿ-ը` որպես ընդդիմություն, պատգամավորը պատասխանեց. «Դժվար թե ընկալվի»: Վահան Բաբայանի խոսքով` Արթուր Բաղդասարյանն առաջին անգամը  չէ,  որ նման քայլերի է դիմում, և ժողովուրդն իր գնահատականը վաղուց արդեն տվել է նման գործիչներին:

Հարցին` հնարավո՞ր է, որ ՕԵԿ-ին առաջարկվել է խաղալ ընդդիմություն, նա պատասխանեց. «Չի բացառվում, ապագա գործընթացներում իրենց ուրույն տեղը զբաղեցնելու համար»:

Դիտարկմանը, որ ՕԵԿ-ական պատգամավոր Հովհաննես Մարգարյանը հայտարարել է, թե երկրի նախագահն առաջարկել է ՕԵԿ-ին պահպանել նախարարական պորտֆելները, Բաբայանը պատասխանեց. «Դրանք  գին թանկացնելու մեխանիզմներ են»: