Գյուղացի կինը զրպարտո՞ւմ է գյուղապետին

Արարատի մարզի Խաչփար գյուղի բնակիչ Տամելա Պողոսյանը արդեն չորրորդ շաբաթն է` գալիս է Կառավարության շենքի մոտ արտահայտելու իր բողոքը` Խաչփարի գյուղապետի դեմ : Տիկնոջ խոսքով` գյուղապետն այնպես է արել, որ իր տան մոտով ջրագիծ չանցնի, ինչի արդյունքում էլ Տամելա Պողոսյանի այգին չորացել է: Կնոջ խոսքով` ինքը այդ հարցով շատ է զբաղվել, անգամ գնացել է գյուղապետի եղբոր տուն, խնդրել, բայց անօգուտ:

«Ինչ անում եմ, օգուտ չի, գյուղապետն ասում ա` ես Սադամ-Հուսեինն եմ, իմ դեմ խաղ չկա»,- yerkir.am-ի հետ զրույցում ասաց Տամելա Պողոսյանը:

Նա նշեց, որ ինքը և ամուսինը երկրորդ կարգի հաշմանդամ են, և գոյատևում էին այդ այգու միջոցով, որը փաստորեն գյուղապետի պատճառով, չորացել է:

Yerkir.am-ի հետ զրույցում Խաչփարի գյուղապետ Ղազար Մարտիրոսյանը նշեց, որ Տամելա Պողոսյանն  իրականում խնդիրներ չունի, որովհետև ոռոգման ջուր ունի:

«Տամելայի նպատակը ուրիշ բան ա, ինքը ցանկանում ա պետության հաշվին արտիզան փորել տա, ինչը արժե վեց միլիոն դրամ»,- ասաց գյուղապետը:

Նա նաև նշեց, որ չէր ուզենա, որ իր գյուղում ապրող տարեց կինը նման խնդրով հասներ կառավարությունը, քանի որ դա իրեն պատիվ չի բերում, և դա զրպարտանք է, սակայն  իրականությունն այն է, որ այդ կինը ոռոգման ջուր ունի, բայց ցանկանում է իրեն զրպարտելով` պետության հաշվին նաև արտիզյան հոր ունենա: