Արտակ Բուդաղյանին կրկին վիրահատել են. հնարավոր է` առաջին դատական նիստը չկայանա

Այսօր Սյունիքի մարզի ընդհանուր իրավասության դատարանում (նստավայրը` Գորիս), դատավոր Նապոլեոն Օհանյանի նախագահությամբ, նշանակված է  Սյունիքի նախկին մարզպետ Սուրիկ Խաչատրյանի տան մոտ տեղի ունեցած միջադեպի գործով առաջին դատական նիստը: Սակայն հնարավոր է դատական նիստը չկայանա, քանի որ գործով անցնող միակ մեղադրյալը` Արտակ Բուդաղյանը, օրեր առաջ է  վիրահատվել  և գտնվում է հետվիրահատական շրջանում: Այս մասին yerkir.am-ին հայտնեց Բուդաղյանի պաշտպան Հայկ Ալումյանը:

Հիշեցնենք, որ Արտակ Բուդաղյանին մեղադրանք է առաջադրվել ՀՀ ՔՕ 137-րդ հոդվածի 1-ին մասի հատկանիշներով: Ըստ մեղադրանքի` Արտակ Բուդաղյանը, իր եղբայր Ավետիք Բուդաղյանից տեղեկանալով, որ 2013-ի հունիսի 1-ին Սյունիքի նախկին մարզպետ Սուրիկ Խաչատրյանի ավտոմեքենայում նրան ծեծի են ենթարկել, նպատակ ունենալով վախեցնել Սուրիկ Խաչատրյանին և նրա ընտանիքի անդամներին, նրանց մոտ առաջացնել տագնապի, սեփական անվտանգության համար անհանգստության զգացում, նույն օրը` ժամը 23-ի սահմաններում, ՎԱԶ 2106 մակնիշի ավտոմեքենայով գնացել է Գորիս քաղաքի Դավիթ-Բեկ փողոցում գտնվող` Սուրիկ Խաչատրյանին պատկանող առանձնատան մոտ և, իր անվամբ գրանցված որսորդական հրացանը ձեռքին, իջնելով ավտոմեքենայից, սպանության սպառնալիքներ է տվել Սուրեն Խաչատրյանի և նրա հարազատների հասցեին:

Նշենք, որ այդ օրը նախկին մարզպետի տան մոտ տեղի ունեցած կրակոցների արդյունքում զոհվել էր Արտակի եղբայրը` գնդապետ Ավետիք Բուդաղյանը: