Արդյունավետ եւ կարեւոր այց էր. Բաքվում գտնվող պատգամավորներն առավոտյան կլինեն Երեւանում

Բաքվում անցկացված` ՆԱՏՕ-ի Խորհրդարանական վեհաժողովի «Rose-Roth» սեմինարն արդեն ավարտվել է:

Yerkir.am-ի հետ զրույցում հայկական պատվիրակության անդամ Թեւան Պողոսյանը հայտնեց, որ վաղն առավոտյան հայկական պատվիրակությունը կլինի Երեւանում: Նա հաստատեց տեղեկությունը, որ հաջորդ տարի Երեւանում կայանալիք միջոցառմանը Բաքվի սեմինարին ներկա բոլոր հյուրերին հրավիրել են, այդ թվում` Ադրբեջանի պատվիրակությանը: Սակայն ադրբեջանցիները հրաժարվել են հրավերից եւ հայերին եւս մեկ անգամ ահաբեկիչներ անվանել:

«Ադրբեջանցիները եւս մեկ անգամ իրենց քսենոֆոբ հայտարարություները հնչեցրեցին, բայց, ինչպես մնացած բոլոր դեպքերում, այս անգամ եւս պատասխան ստացան»,- ասաց Թեւան Պողոսյանը:

Բաքու կատարած այցը պատգամավորն արդյունավետ է համարում: «Սեմինարի ավարտից հետո արտասահմանյան բոլոր հյուրերը մոտեցան եւ շնորհակալություն հայտնեցին մասնակցության համար: Արդյունավետ էր նաեւ մեզ համար՝ ուրիշների մտածելակերպը հասկանալու, նրանց տեղեկություն տրամադրելու տեսանկյունից: Արդյունավետ եւ կարեւոր այց էր»,- ասաց Պողոսյանը: