Արմեն Չարչյանի տեսքը մտահոգիչ է․ «Հայաստան» խմբակցության պատգամավորներն այցելել են կալանքի տակ գտնվող պատգամավորներին

ԱԺ «Հայաստան» խմբակցության պատգամավորներ Վահե Հակոբյանը, Աննա Գրիգորյանը և Հռիպսիմե Ստամբուլյանն այսօր այցելել են Վարդաշեն Քրեակատարողական հիմնարկում գտնվող պատգամավորներ Արմեն Չարչյանին, Արթուր Սարգսյանին և Մխիթար Զաքարյանին:

«Կիսվել ենք խմբերի, և ամեն անգամ մեկ խումբ գալիս է իր գործընկերներին տեսակցության»,- այս մասին հայտնել է խմբակցության պատգամավոր Վահե Հակոբյանը:

Հակոբյանը հրավիրել է Մարդու իրավունքների կառույցների և միջազգային հանրության ուշադրությունը Արմեն Չարչյանին այդ վիճակում կալանքի տակ պահելու փաստին։

«Պարոն Չարչյանի կարգավիճակը այլ է: Դուք գիտեք, որ ինքն ունի խեստ առողջական խնդիրներ՝ նա տարել է սուր ինֆարկտ: Եվ այս պարագայում ինձ համար անհասկանալի է քննչական մարմինների համառությունը և պնդումը, որ պահեն կալանքի տակ: Ի տարբերություն մեր մնացած տղաների, պարոն Չարչյանի տեսքը վիզուալ կտրուկ տարբերվում է»,-ասել է Հակոբյանը:

«Հայաստան» խմբակցության պատգամավոր, «Իզմիրլյան» ԲԿ նախկին տնօրեն Արմեն Չարչյանը սեպտեմբերի 3-ին հիվանդանոցից տեղափոխվել է քրեակատարողական հիմնարկ։  

Արմեն Չարչյանի առողջական վիճակը կտրուկ վատացել էր և նա տեղափոխվել էր քաղաքացիական հիվանդանոց:

Չարչյանն իրեն առաջադրված մեղադրանքը չի ընդունում:

Մանրամասները՝ տեսանյութում: