Արծվիկ Մինասյանը պահանջում է փոխել արտահերթ նիստի օրակարգը

Կառավարությունը ԱԺ է ներկայացրել արտահերթ նիստի անցկացման որոշում, ըստ այդմ` առաջարկվում է արտահերթ նիստի առաջին օրն անցկացնել մեկուկես ժամ տևողությամբ երեք նիստ, երկրորդ օրվանից սկսած` յուրաքանչյուր օր գումարել մեկուկես ժամ տևողությամբ չորս նիստ: Նիստերը սկսվելու են ժամը 11-ից:

Այսօր այդ մասին ԱԺ արտահերթ նիստից առաջ հայտարարեց ԱԺ նախագահ Գալուստ Սահակյանը: Նա նաև հավելեց, որ կառավարությունը ներկայացրել է օրինագծեր, որոնք ԱԺ-ն պետք է ընդունի մի քանի ընթերցմամբ, և ԱԺ կանոնակարգ օրենքի համաձայն` կառավարությունը ներկայացրել է որոշման երկու նախագիծ:

Առաջին որոշմամբ` առաջարկվում է մի շարք օրենքների` երկրորդ ընթերցմամբ քննարկումն անցկացնել առաջին ընթերցմամբ քննարկումից 24 ժամվա ընթացքում:Կան նաև հատուկ որոշմամբ նախագծեր:

«Առաջարկում եմ քվեարկել այս որոշումներն ընդունելու մասին հարցը»,- ասաց Գալուստ Սահակյանը:

Վարման կարգով ելույթ ունեցավ ԱԺ ՀՅԴ խմբակցության պատգամավոր Արծվիկ Մինասյանը` ասելով, որ, իրավական ակտերի մասին օրենքի համաձայն, նախագիծ մշակող մարմինը կազմակերպում է նախագծի վերաբերյալ հանրային քննարկումներ, որի ժամկետը չի կարող պակաս լինել 15 օրից, մինչդեռ` առաջարկված օրակարգում բազմաթիվ օրինագծեր ոչ միայն 15 օրվա ռեժիմը չեն պահպանել, այլև չեն հրապարակվել: «Մենք ո՞նց կարող ենք քննարկել այդ նախագծերը այս դահլիճում»,- հարցրեց պատգամավորը:

Նա առաջարկեց Գալուստ Սահակյանին, որ օգտագործի իր լիազորությունները եւ կառավարությանն առաջարկի փոխել օրակարգը և հանել այն հարցերը, որոնք չեն համապատասխանում հիշյալ օրենքի պահանջին:

Գալուստ Սահակյանն էլ նշեց, որ պատգամավորները ի գիտություն պետք է ընդունեն, որ նիստն արտահերթ է: