«Ամեն հայի պատկերացման մեջ Ղարաբաղը ՀՀ մաս է». արցախցիներն արձագանքում են Սարգսյանի հայտարարությանը

Արցախցիները դժգոհ են Հայաստանի նախագահի վերջին հայտարարությունից: «Երկիրն այսօրի» զրուցակիցներից մի քանիսն ասել են, թե համաձայն չեն Արցախի` Հայաստանի մաս չկազմելու մասին` Սերժ Սարգսյանի դիտարկմանը: Առավել ևս` նրանք չեն հավատում, թե Մաքսային միությանն անդամակցելը կնպաստի Լեռնային Ղարաբաղի խնդրի կարգավորմանը:

«Անհասկանալի հայտարարություն է, և մի քանի հոգուց դրա պատասխանը լսել եմ, որ ինչ էլ ասեր, ճիշտ կլիներ, միայն թե Նազարբաևի մոտ ասեր, ընդեղ չլռեր, ստեղ ասեր»,- ասաց «Եկիրն այսօրի» զրուցակիցներից մեկը:

«Այնտեղ կա առնվազն 2 հանգամանք, որոնք շատ կասկածելի են: Նախ` նշվում է, որ Արցախը ՀՀ-ի մաս չէ թե' օրենսդրությամբ, թե' մեր պատկերացումներով: Եթե օրենսդրորեն վերցնենք, ապա կա ՀՀ Գերագույն խորհրդի որոշումը, որով ԼՂՀ-ն հռչակվում է ՀՀ մաս: Իսկ պատկերացմամբ` կարծում եմ՝ ամեն հայի պատկերացման մեջ Ղարաբաղը ՀՀ մաս է»,- նշեց մեկ այլ զրուցակից։