«ԱրմենՏելը» խոչընդոտել է «Ռոստելեկոմ» ընկերության գործունեությանը

«Ռոստելեկոմ» ընկերությունը դիմել է ՏՄՊՊՀ-ին` հայտնելով, որ իր ծառայությունների աշխարհագրությունը ընդլայնելու և բաժանորդներին ինտերնետ կապ  տրամադրելու նպատակով անհրաժեշտ է վարձակալել  «ԱրմենՏել» ընկերությանը պատկանող որոշ ենթակառուցվածքներ:

«Ռոստելեկոմը» տեղեկացրել է նաև, որ  օրենսդրության պահանջին համապատասխան կատարել է  բոլոր վճարումները, սակայն «ԱրմենՏել»-ը «Ռոստելեկոմին» ներկայացրել է պայմանագիր, որտեղ, բացի օրենսդրությամբ սահմանված վարձակալական գումարից, ներառված են եղել նաև լրացուցիչ այլ վճարներ, որոնք տարեկան հաշվով կազմում են մոտ 1 միլիոն 720 հազար դրամ: Փաստացի, նշվում է ՏՄՊՊՀ-ի կողմից,  «Ռոստելեկոմը» չի կարող այդ ծառայությունները ստանալ մեկ այլ ընկերությունից, քանի որ նման ենթակառուցվածքներ ունի միայն  «ԱրմենՏելը»: 

Հանձնաժողովը պարզել է, որ, վստահ լինելով, որ ընկերությունն այլընտրանք չունի, «ԱրմենՏելը» փորձել է նրան պարտադրել պայմաններ և լրացուցիչ գումարներ գանձել:   Ուստի «ԱրմենՏելը», նշում է հանձնաժողովը, պարտավոր է բավարարել ցանկացած ընկերության դիմում, եթե վերջինս կատարել է համապատասխան ֆիքսված վճարումները:

Նիստի ընթացքում «Ռոստելեկոմի» տնօրեն Հայկ Ֆահրամազյանը տեղեկացրեց, որ Հանձնաժողովի միջամտության արդյունքում խնդիրը արդեն իսկ կարգավորվել է և առանց լրացուցիչ պայմանների և վճարների պարտադրման «ԱրմենՏելը» կնքել է պայմանագիրը: