Վարչապետն ու նախարարը պարեցին շրջանավարտների հետ

Երևանի թիվ 119 ավագ դպրոցում վերջին զանգը հնչեց «պաշտոնական» մթնոլորտում: Այս տարի այդ դպրոցին էր բախտ վիճակվել հյուրընկալելու վարչապետ Հովիկ Աբրահամյանին, կրթության եւ գիտության նախարար Արմեն Աշոտյանին, ԱԺ պատգամավոր Ռուզաննա Մուրադյանին և այլոց:

Հովիկ Աբրահամյանին աշակերտները դիմավորեցին աղուհացով, հետո նրա կրծքին փակցրեցին վերջին զանգի խորհրդանիշը` ժապավենով զանգերը, ապա ծափողջյունների ներքո հրավիրեցին դահլիճ` դպրոցի շրջանավարտների կազմակերպած տոնական միջոցառումն ունկնդրելու:

Դահլիճում արդեն վարչապետին ողջունեցին գեղեցիկ պարով, ավարտող աշակերտուհիներից մեկն էլ` երգով: Ու երբ ավարտողներն արդեն դանդաղ պարեղանակ էին նվիրում  իրենց դպրոցին, ուսուցիչներին ու հյուրերին, վարչապետն անսպասելի տեղից վեր կացավ, մոտեցավ երգող աղջկան ու  նրան հրավիրեց պարի:

Արմեն Աշոտյանը նույնպես հետևեց վարչապետի օրինակին` պարի հրավիրելով մեկ այլ աշակերտուհու: Իսկ հետո թե' վարչապետը, թե’ ԿԳ նախարարը, թե’ Ռուզաննա Մուրադյանը աշակերտներից նվեր ստացան` իրենց նվիրված մեկական «ներբող», իսկ ներբողներից հետո` տուփերով նվերներ:

Աշակերտները, ոգեւորված վարչապետի անմիջականությունից, իրենք սկսեցին նրան պարի հրավիրել` վալսի, տանգոյի, նաև ռիթմիկ պարի: Վերջում Հովիկ Աբրահամյանն իր շնորհավորանքներն ու բարեմաղթանքները հղեց ավարտողներին:

Մանրամասները` տեսանյութում: