ՀՅԴ-ի ներկայացրած օրինագծի վերաբերյալ քառյակը ձևավորել է միասնական կարծիք

Այսօր Ազգային ժողովի ՀԱԿ խմբակցությունում ոչ իշխանական չորս ուժերը քննարկել են ՀՅԴ խմբակցության` համամասնական ընտրական համակարգին անցնելու օրինագիծը: «ՀՅԴ խմբակցությունը հրատապ է համարել համամասնական ընտրական համակարգին անցնելու իրենց օրինագիծը, որը քառյակի միասնական հավանությանն է արժանացել»,- լրագրողների հետ զրույցում ասաց ՀԱԿ խմբակցության ղեկավար Լևոն Զուրաբյանը:

Նրա խոսքով՝ չորս ոչ իշխանական խմբակցությունները համարում են, որ Հայաստանում գոյություն ունեցող ընտրական համակարգը, ըստ էության, նպաստում է համակարգի աղճատվածությանը, և մեծամասնական մանդատներով ընտրվում են այն մարդիկ, ովքեր ավելի շատ նպաստում են իշխանության վերարտադրմանը:

«Մենք համարում ենք, որ անցումը 100% համամասնական ընտրական համակարգին կնպաստի Հայաստանում ժողովրդավարությանը: Այնպես որ` այդ նախագիծը չորս քաղաքական ուժերի կողմից ունի լիակատար հավանություն»,- ասաց Զուրաբյանը:

Հիշեցնենք, որ, ըստ ԱԺ կանոնակարգի, խմբակցություններն իրավունք ունեն որևէ նախագիծ համարել հրատապ և ԱԺ լիագումար նիստում քննարկման դնել արտահերթ կարգով: