Ես չեմ կիսում այն մոտեցումը, թե տարբեր երկրներ երկակի ստանդարտներ են ցուցաբերում. Սերժ Սարգսյանի տարօրինակ հայտարարությունը

ՀՀ նախագահ Սերժ Սարգսյանը Ֆրանսիայի նախագահի հետ համատեղ ասուլիսում անդրադարձավ ԵԱՀԿ Մինսկի խմբի համանախագահների եւ Ջ. Ուորլիքի վերջին հայտարարություններին՝ կապված ԼՂ համակարտության կարգավորման հետ:

Նա նախ հայտարարեց, որ ասել եւ ասում է` բոլոր հակամարտությունները չի կարելի դիտարկել մեկ հարթություն մեջ, ուստի նաեւ հակամարտությունների լուծման մոտեցումները տարբեր են:

Սերժ Սարգսյանը նշեց նաեւ, որ Ուորլիքը հիմնականում որեւէ նոր բան չի ասել, ասել է այն, ինչ իր նախագահը ասել է տարբեր առիթներով: Նույն մոտեցումը, ըստ Սերժ Սարգսյանի, կա նաեւ զինադադարի 20-ամյակի առթիվ արված` համանախագահների հայտարարության մեջ:

«Որքան էլ Ադրբեջանի ղեկավարությունը փորձի այդ մոտեցումները յուրովի մեկնաբանել, միեւնույն է՝ ոչինչ չի ստացվելու»,- ասաց Սերժ Սարգսյանը:

Նա նաեւ ընդգծեց, որ չի կիսում այն մոտեցումը, թե իբր տարբեր երկրներ ցուցաբերում են երկակի ստանդարտներ: Այդ մոտեցումները, ըստ Սերժ Սարգսյանի, բխում են հակամարտությունների պատմությունից, ծագումնաբանությունից: «Որեւէ փոփոխություն ես չեմ տեսնում»,- ասաց Սերժ Սարգսյանը: