Սեփական թշնամիներին Վլադիմիր Գասպարյանը հոտով է զգում, իսկ տկարամիտներին երկար հանդուրժել չի պատրաստվում

Հաղթանակի այգում մայիսի 9-ի տոնական միջացառմանը ներկա էր նաեւ ՀՀ ոստիկանապետ Վլադիմիր Գասպարյանը: Ներկայացնում ենք Գասպարյանի եւ Yerkir.am-ի փոքր զրույցը:

-Պարո'ն Գասպարյան, ասում են՝ Ձեր դեմ դավադրություն է հյուսվում:

-Աստված իրենց հետ:

-Անգամ հեղինակների անուններ են նշվում՝ Գագիկ Ծառուկյան, Հովիկ Աբրահամյան…

-Չեեմ կարծում… Նպատա՞կը...

-Ըստ չար լեզուների՝ նպատակը Ձեզ պաշտոնանկ անելն է:

-Ինձ պաշտոնանկ անելն էդ ձեւ հեշտ չի:

-Վտանգավոր բան ասացիք:

-Ինչո՞ւ:

-Փաստորեն՝ հավերժ եք:

-Ես հավերժ չեմ, բայց ես աշխատող տեսակ եմ:

-Այսինքն՝ դավադիրները հույսները կտրեն:

-Դավադրություններով ինձ պաշտոնանկ չես անի:

-Պարո'ն Գասպարյան, ի դեպ, որտե՞ղ է Ձեր թիկնազորի պետը, ասում են՝ ԱԱԾ-ում նստած է եղել:

-Դա բացարձակապես իրականության հետ ոչ մի կապ չունի:

-Որտե՞ղ է հիմա:

-Այստեղ, բերել եմ` ցույց տամ:

-Կարո՞ղ եք ասել՝ գա, ուզում եմ սեփական աչքովս տեսնել՝ բռնության հետքեր վրան կա՞ն, թե՞ ոչ:

-Ծեծել են դաժան, տանջել են, բայց փրկեցինք (կատակում է): (Այդ պահին զրույցին միացավ Արշակ Հակոբյանը՝ թիկնազորի պետը): Ես ձեր միջոցով պատվերներ կատարող լրագրողներին ուզում եմ ասել, որ ոստիկանությունն ամեն ինչ տեսնում է եւ գիտի պատվիրատուներին: Խորհուրդ եմ տալիս հանգիստ ապրել:

-Պարո'ն Գասպարյան, փաստորեն, գիտեք Ձեր թշնամիներին:

-Ես հոտով եմ զգում: Դա իմ աշխատանքն է:

-Իսկ շա՞տ են Ձեր թշնամիները:

-Ես թշնամիներ չունեմ` պրինցիպի, բայց տկարամիտներ շատ կան, ում հետ ստիպված եմ լինում շփվել: Ես նրանց ցավակցում եմ: Մի քիչ կհանդուրժեմ, բայց ոչ՝ շատ:

-Ի դեպ, մի հարց էլ, եւ վերջ: Չար լեզուներն ասում էին նաեւ, որ վարչապետ դառնալու հավակնություններ ունեիք:

-Ինձ քչից թե շատից ճանաչողները գիտեն իմ տեսակը: Դա ոմանց հիվանդ երեւակայության արդյունքն է: Ես չեմ տառապում: Ես իմ տեղում եմ, եւ սա իմ տեղն է: Նմա՞ն եմ երազկոտ կամ դատարկախոս մարդու:

Զրուցեց՝ Ագնեսա ԽԱՄՈՅԱՆԸ