Չվերթերի 40 տոկոս աճ` նախորդ ապրիլի համեմատ

Վերջին ամիսներին օդային փոխադրումների ոլորտում առկա է և' ուղևորների թվի, և' չվերթերի թվի կանոնավոր աճ: Այս մասին տեղեկանում ենք «Արմենիա Միջազգային Օդանավակայաններ» ՓԲԸ-ից:

2014թ. ապրիլին, 2013թ. նույն ժամանակահատվածի համեմատ, «Զվարթնոցում» ուղևորահոսքն ավելացել է 17 տոկոսով: Եթե 2013թ. ապրիլին «Զվարթնոց» միջազգային օդանավակայանի ծառայություններից օգտվել է 116 838 ուղևոր, ապա 2014թ. ապրիլի ցուցանիշը կազմում է 136 730 ուղևոր: Չվերթերի աճն այդ ժամանակահատվածում կազմել է 40 տոկոս:

2014թ. ապրիլին կատարվել է 1643 չվերթ` նախորդ տարվա նույն ժամանակահատվածի 1175 չվերթի համեմատ: Եթե 2013թ. ապրիլին դեպի «Զվարթնոց» կանոնավոր չվերթեր իրականացնում էր 27 ավիաընկերություն, ապա այժմ դրանց թիվը 33 է: Բացի այդ`  ավիաընկերություններից շատերն ավելացրել են չվերթերի հաճախականությունները բոլոր ուղղություններով, ինչը հանգեցրել է ավիատոմսերի գնի նվազմանը: