Հայաստանից ավելի շատ են մեկնում զբոսաշրջության, քան դրսից են գալիս Հայաստան

ԱՎԾ-ի` երեկ հրապարակած տվյալների համաձայն` 2014թ.  առաջին երեք ամիսներին  հանրապետություն է ժամանել   154 հազար  471   զբոսաշրջիկ:

Ըստ ՄԱԿ-ի զբոսաշրջության համաշխարհային կազմակերպության  մեթոդաբանության' միջազգային զբոսաշրջիկ է համարվում ցանկացած անձը, որը հանգստանալու, բուժվելու, հարազատներին այցելելու, գործնական, կրոնական կամ  այլ  նպատակներով ճանապարհորդում է  իր  հիմնական բնակության վայրից  մեկ այլ վայր ոչ պակաս քան 24 ժամ և  ոչ ավելի քան անընդմեջ  1 տարի  ժամանակով: Այսինքն' նրա հիմնական նպատակը ճանապարհորդելն է, այլ ոչ թե աշխատանքային գործունեությամբ զբաղվելը, որի դեպքում ուղևորության համար վճարումները կկատարվեին ժամանած վայրում աշխատանքային գործունեությունից ստացված   ֆինանսական միջոցների հաշվին:

Միջազգային զբոսաշրջիկների վերաբերյալ ցուցանիշը, ինչպես նշում է ԱՎԾ-ն, նախորդ տարվա նույն ժամանակաշրջանի նկատմամբ աճել է 20.5 տոկոսով: 2014թ.  հունվար-մարտին  զբոսաշրջության  նպատակով  Հայաստանից մեկնողների թիվն էլ կազմել է 162 հազար 73 մարդ,  կամ 2013թ.  համապատասխան   ժամանակաշրջանի  նկատմամբ ցուցանիշն աճել է 18.2 տոկոսով:

Ի դեպ' 2012-2013թթ. և 2014թ. առաջին եռամսյակի տվյալները նախնական են և ճշգրտվելու են 2013-ին ՀՀ ԱՎԾ կողմից իրականացված հետազոտության արդյունքների հիման վրա: