Առողջապահության նորանշանակ նախարարը 100 օր խնդրեց

Կառավարության նիստից հետո առողջապահության նորանշանակ նախարար Արմեն Մուրադյանը լրագրողներին խնդրեց թույլ տալ իրեն պահպանել իօրենքով հասանելիք 100 օր լռությունը` ծրագրային մասով: «Եթե օպերատիվ հարցեր կլինեն, կապված համակարգի հետ, սիրով կպատասխանեմ»,- ասաց նա:

Լրագրողների հարցին` անձամբ Սերժ Սարգսյանի կողմի՞ց է ինքը նախարարի պաշտոնը զբաղեցնելու առաջարկ ստացել, նորանշանակ նախարարը պատասխանեց, որ առաջարկը ստացել է երկրի ղեկավարության` ե'ւ վարչապետի, ե'ւ նախագահի կողմից, որից հետո արդեն եղել է նշանակումը:

Լրագրողները Մուրադյանից հետաքրքրվեցին նաեւ, թե ի՞նչ է անելու առողջապահության համակարգում` որպես նախարար, ո՞րն է լինելու նրա առաջին քայլը, արդյոք ազատվելո՞ւ է Դերենիկ Դումանյանի կադրերից, թե՞ նրա որդեգրած քսաղաքականությունն է առաջ տանելու: Նախարարը պատասխանեց, որ կադրային մեծ փոփոխություն չի պատրաստվում կատարել` մինչեւ ծրագրերը պատրաստ չլինեն:

Ոլորտում, ըստ նրա, բազմաթիվ խնդիրներ կան: «Ես այդ խնդիրներին քաջատեղյակ եմ` որպես այդ ոլորտի ճակատում ամենօրյա աշխատանք ունեցող անձնավորություն, եւ այդ խնդիրները խմբագրելուց հետո կլինեն հստակ ծրագրեր»,- նշեց նախարարը: