Պարտադիր կուտակայինի հարցում իշխանությունները փորձում են հոգեբանական ճնշում գործադրել

«Դեմ եմ» բողոքի ակցիան մեկնարկել է: Ակցիայի մասնակիցներից մեկը, դիմելով ակցիային ուղիղ եթերում հետեւող քաղաքացիներին, կոչ արեց հեռանալ  համակարգիչների էկրաններից եւ միանալ բողոքի ակցիային: Նա ընդգծեց, որ թեեւ բազմաթիվ նամակներ են ուղարկել ՊԵԿ եւ ֆինանսների նախարարություն, բայց պետք է գիտակցել, որ հարկավոր է այդ նամակները եւ պահանջները ֆիզիկապես պաշտպանել:

«Իշխանություններն ավտոմատացված համակարգով նամակներ են ուղարկում մարդկանց տներ եւ տեղեկացնում, թե իրենց համար ֆոնդ են ընտրել: Կոչ ենք անում մեր քաղաքացիներին` էմոցիոնալ կերպով չընդունել այդ նամակները, քանի որ իշխանություններն ուզում են մարդկանց փաստի առջեւ կանգնեցնել` ցույց տալով, թե համակարգն արդեն գործում է, եւ այլ տարբերակ չկա»,-ասաց ակցիայի մասնակիցը:

Ակցիայի մասնակիցները նաեւ նշեցին, որ ՍԴ-ն իրենց զենք է տվել եւ պետք է օգտվեն այդ զենքից: «Պետք է մինչեւ վերջ պայքարել հակասահմանադրական օրենքի դեմ»,- նշեցին նրանք: