Հովիկ Աբրահամյանը խորհրդակցության հրավիրեց խմբակցությունների ղեկավարներին

ԱԺ նիստում, երբ քվեարկության էր դրվել «Պետական գույքի կառավարման մասին» օրենքը, ԱԺ ՀԱԿ խմբակցության ղեկավար Լևոն Զուրաբյանը, վարման կարգի հետ կապված, առաջարկեց վերցնել քսան րոպե ընդմիջում:

«Քանի որ լուրջ մտավախության կա, որ այս քվեարկությամբ կարող ենք ընդունել օրենք, որը հակասում է Սահմանադրությանը, ուստի առաջարկում եմ ԱԺ նախագահին խորհրդակցություն հրավիրել՝ խմբակցությունների ղեկավարների մասնակցությամբ: Համենայն դեպս, մենք` չորս ուժերի խմբակցությունները, ունենք նման պայմանավորվածություն»,- ասաց նա:

ԱԺ նախագահ Հովիկ Աբրահամյանը հայտարարեց, որ խմբակցությունների ղեկավարներին հրավիրում է խորհրդակցության:

Նշենք, որ խորհրդակցությունից հետո կազմակերպվեց քվեարկություն և «Պետական գույքի կառավարման մասին» օրենքը ընդունվեց՝ 62 կողմ և 42 դեմ ձայներով:

Մինչ քվեարկությունը ԱԺ նախագահ Հովիկ Աբրահամյանը նշեց, որ խմբակցությունների հետ խորհրդակցության ժամանակ քննարկվել է օրենքը և արձանագրվել է, որ կան խնդիրներ, որոնց կանդրադառնան առաջին ընթերցումից հետո, և անհրաժեշտության դեպքում կկազմակերպեն լսումներ: