Սփյուռքի նախարարությունը` քեսաբահայության վիճակի մասին

Սփյուռքի նախարարությունը պարբերաբար կապի մեջ է հայ համայնքի հետ, հայ բնակչությանը կոնկրետ օգնելու նպատակով որոշակի քայլեր են ձեռնարկվել: Հիմա համայնքի հետ ճշգրտվում են ընդհանուր մանրամասները, եւ Սփյուռքի նախարարությունն ուշադիր հետեւում է Քեսաբում տեղի ունեցող բոլոր իրադարձություններին. Yerkir.am-ի հետ զրույցում ասաց Սփյուռքի նախարարի մամուլի քարտուղար Մամիկոն Խուրշուդյանը:

Նա նշեց, որ քեսաբահայության վիճակը տագնապահարույց է, քեսաբցիները հայտնվել են չափազանց ծանր վիճակում: Սակայն իրենց օջախները վերադառնալու եւ իրենց տներին, ինչքին տեր կանգնելու հույսը չեն կորցնում:

«Ձեռնարկվող միջոցառումները հենց այդ նպատակին են ուղղված, որպեսզի նրանք չմտածեն Սիրիան լքելու մասին, այլ վերադառնան իրենց տները: Իրավիճակի ցանկացած զարգացման պարագայում մենք պետք է զորավիգ լինենք ու կանգնենք մեր հայրենակիցների կողքին: Մենք ամեն ինչ իրենց հետ մանրամասնորեն ճշտում ենք: Կապը Լաթաքիայում ապաստանած քեսաբահայերի հետ պարբերաբար կա, եւ տեղում, ըստ անհրաժեշտությամբ տարբեր միջոցներ ու միջոցառումներ են ձեռնարկվում»,- ասաց Մամիկոն Խուրշուդյանը:

Նա տեղեկացրեց, որ այս պահին քեսաբահայության կարգավիճակի, Սիրիայում ստեղծված իրավիճակի, ինչպես նաեւ Լաթաքիայում ապաստանած քեսաբահայերի թվաքանակի մասին տվյալները ճշգրտման փուլում են: