Որ էս հրապարակի լույսերը տեսնում եմ, նախանձում եմ. գորիսեցի տատիկի բողոքը

«Ամեն օր մի քանի ջահել եմ տանում քաղաք` աերոպորտ, որ գնան Ռուսաստան, էսօր լավ օր ա` մարդ չեմ տանում»,- yerkir.am-ի հետ զրույցում պատմեց 50-ամյա գորիսեցի, տաքսու վարորդ Լևոնը, ով Գորիսից Երևան է տեղափոխում ուղևորներին:

Խոսելով արտագաղթի, սոցիալական ծանր վիճակի, երկրի ու ղեկավարության մասին` վարորդն անդրադարձավ իր համար առաջնային խնդիրներից մեկին` ցանքին: Նրա խոսքով` իրենց արդեն որերորդ անգամ է` խաբում են սիսիանցի սերմացու վաճառողները, ովքեր էլիտար սերմի անվան տակ անորակ սերմացու են բերում, որից բերք չի ստացվում, ծախսերն ավելանում են, բանկերի վարկերն էլ` հետը:

Գորիսում, ինչպես և հանրապետության մյուս քաղաքներում, բանկերի առջև մշտապես հերթեր են, հիմնական այցելուներն էլ քաղաքի հարակից գյուղերից եկած բնակիչներն են: Երբ բանկ այցելած քաղաքացիներից մեկից հետաքրքրվեցինք, թե գո՞հ է քաղաքի մաքրությունից, նշեց, որ տեղացի չէ, իսկ Գորիսում էլ մի փողոց գիտի` իրեն ծանոթ բանկի փողոցը, որի մաքրությանը երբևէ ուշադրություն չի դարձրել:

Նշենք, որ Գորիսում տիրող անտարբերության մթնոլորտը համատարած էր: Շատերը խուսափում էին տեսախցիկի առջև բարձրաձայնել իրենց խնդիրները: «Մեկ է, դրանից ի՞նչ օգուտ, համ էլ, որ քիչ ենք բողոքում, գլուխներս հանգիստ ա լինում»,-  ասաց անցորդ մի կին, ով շտապում էր բանկ` վարկը մուծելու:

Քաղաքում տիրող բազմաթիվ սոցիալական խնդիրներին վերջերս գումարվել է մեկը` հանրությանն այդքան հետաքրքրող Որոտանի ՀԷԿ-երի համալիրի գույքի առուվաճառքի պայմանագիրը: Բանն այն է, որ այնտեղ ներկայումս աշխատում է 230 մարդ, ովքեր հիմնականում Գորիսից են, և խոսակցություններ են շրջանառվում, թե համալիրի  կենտրոնական գրասենյակում ապագայում աշխատակիցների կրճատումներ են սպասվում:

Գորիսում, ի տարբերություն մյուս քաղաքների, ջրամատակարարման և գազիֆիկացման խնդիրն առաջնային չէ, քանի որ այնտեղ ստեղծված են համեմատաբար լավ պայմաններ: Քաղաքի կենտրոնը բարեկարգ է, սակայն ծայրամասերում վիճակն այլ է` փողոցները քարուքանդ են, առանց լուսավորության:

Գորիսի Գուսան Աշոտի անունը կրող փողոցի բնակիչներից` 80-ամյա տիկին Ռոզան պատմեց, որ իրենց փողոցում ընդհանրապես լուսավորություն չկա: «Որ էս հրապարակի լույսերը տեսնում եմ, նախանձում եմ»,- ասաց նա: Տիկին Ռոզան դժգոհեց նաև քաղաքի մաքրությունից, մի բան, որ գորիսեցիների հպարտության առիթն է եղել. կարմիր կտուրների քաղաքը բազմաթիվ այցելուներին մշտապես գրավել է իր կոկիկությամբ և մաքրությամբ:

«Գորիսի շուկան աղբանոց ա, լավ կլինի, որ մաքրեն, կարգին շուկա դարձնեն»,- ասաց տատիկը:

Իսկապես, իր մաքրությամբ հայտնի քաղաքը մեր այցելության ժամանակ աղբանոց էր հիշեցնում: Գուցե պատճառներից մեկն այն է, որ դեռ նոր է ձյունը հալվել,  և մաքրման աշխատանքներ չեն սկսվել, սակայն հատկապես Գորիսում գարունը ժամանակին է գալիս, և մաքրության մասին մտածել պետք է ժամանակին: Ինչևէ, հույս ունենանք, որ մեր հաջորդ այցելության ժամանակ քաղաքը կգա իր նախկին տեսքին` գոնե մաքրության առումով:

Ցավոք, մեր այցելությունը Գորիս այս անգամ կարճ տևեց, չհասցրեցինք շատերի հետ զրուցել և բնակիչներին հուզող խնդիրներին մանրակրկիտ անդրադառնալ: Խոստանում ենք այդ բացը լրացնել հաջորդ անգամ, իսկ մինչ այդ առաջարկում ենք դիտել yerkir.am-ի տեսանյութը, որում բնակիչները բարձրաձայնում են քաղաքի խնդիրների մասին:

Թագուհի ՄԵԼՔՈՆՅԱՆ