Բարձրաքաշ Սուրբ Գրիգոր վանքը՝ «Եվրոպա Նոստրա»-ի` 7 առավել վտանգված հուշարձանների ցանկում

«Եվրոպա Նոստրա» մշակութային ժառանգության եվրոպական առաջատար կազմակերպությունը և Եվրոպական ներդրումային բանկի ինստիտուտը հայտարարեցին 2014 թ. «7 առավել վտանգված» ծրագրում ընդգրկված 11 հուշարձանների և տեսարժան վայրերի նախնական ցանկը (ընտրված հուշարձանների  նկարները կարող եք դիտել այստեղ): Միջազգային հանձնաժողովի փորձագետների կողմից ընտրված վտանգված հուշարձանների ցանկում է նաև ՀՀ Լոռու մարզի Բարձրաքաշ Սուրբ Գրիգոր վանքը:

Կազմակերպության «7 առավել վտանգված» ծրագիրը մեկնարկել է 2012 թ. հունվարին, որի հիմնական նպատակներից է միևնույն գաղափարի շուրջ միավորել մասնավոր և պետական մի շարք կազմակերպությունների` բացահայտելու ժառանգության պահպանության համար ֆինանսական նոր աղբյուրներ:

2013 թ. Հայաստանը «7 առավել վտանգված» ծրագրին ներկայացրեց Արագածոտնի մարզի Սբ Պողոս-Պետրոս եկեղեցու հայտը, որն էլ մասնակից 21 երկրներից ու ներկայացված 40 հայտերից ընդգրկվել էր ծրագրի նախնական ցանկում (14 կոթող): Այնուամենայնիվ, յոթնյակում տեղ գտավ Մարդինի (Արևմտյան Հայաստան, Դիարբեքիրի վիլայեթ, այժմ` Մարդինի վիլայեթի վարչական կենտրոնը) Սբ Գևորգ հայկական եկեղեցին` ներկայացված Թուրքիայի կողմից: Վերջնական յոթնյակի ընտրությունից հետո «Եվրոպա Նոստրա»-ի ժառանգության փորձագետներից, կազմակերպության անդամներից, ինչպես նաև ֆինանսական ու տեխնիկական մասնագետներից կազմված թիմն այցեր է կատարում բոլոր 7 ընտրված վայրերով, որտեղ տեղի մասնագետների հետ միասին անցկացվում են ուսումնասիրություններ և մշակվում կոթողները փրկելու նախագծեր: