Մարտի 1-ի հանրահավաքում կպարզվի ժողովրդի պատվերը` ընդդիմությանը

Երկար ժամանակ ՀԱԿ-ը հանրահավաք չի արել` շուրջ մեկ տարի, այդ ընթացքում լուրջ փոփոխություններ են տեղի ունեցել: Այս մասին Yerkir.am-ի հետ զրույցում ասաց ԱԺ ՀԱԿ խմբակցության պատգամավոր Արամ Մանուկյանը` խոսելով վաղվա` մարտի 1-ի հանրահավաքի մասին: «Թե այդ փոփոխությունները որքանով են ըմբոստության վերածվելու ընդունակ, և որքանով է մեզ նոր պատվեր ձևակերպվելու, դրանից կախված կլինի մեր հաջորդ քայլը»,- ասաց նա: 

Մանուկյանը չցանկացավ իրադարձությունների սցենարը համեմատել Ուկրաինայում տեղի ունեցած իրադարձությունների հետ, քանի որ իրենք մտադիր են առաջ գնալ խաղաղ տարբերակով, քաղաքացիական ճնշումների տարբերակով:

Նա նշեց, որ հանրահավաքին հրավիրվելու են բոլոր այն քաղաքացիական խմբերը, որոնց իրավունքները ոտնահարված են` տաքսիստներ, կարմիր գծերի ու արագաչափեր, կուտակայինի դեմ բողոքողներ և այլք:

«Այդ օրը մենք կստուգենք, թե  ինչքանով է հասարակությունը ընդառաջ գալիս խնդիրներին: Այդ օրը  տեղում մենք կտեսնենք` ինչ է մեզնից պահանջում ժողովուրդը: Մեր հաջորդ քայլը կլինի պարզել մեզ ուղղված` հասարակության պատվերը, թե հասարակությունը այդ օրը մեզ ինչ պատվեր կտա»,- ասաց Արամ Մանուկյանը: