Վարդան Օսկանյանը չի բացառում ԲՀԿ-ում Սերժ Սարգսյանի հրաժարականի պահանջի քննարկումը

ԲՀԿ-ն այդ կատեգորիաներով չի գնահատում քաղաքական ներկապնակի գույները: ԲՀԿ-ն իր գործունեությամբ ապացուցում է՝ ինչ է անում: Այս մասին ԲՀԿ 7-րդ համագումարի ավարտից հետո լրագրողների հետ զրույցում ասաց ԲՀԿ պատգամավոր, ՀՀ նախկին արտգործնախարար Վարդան Օսկանյանը՝ պատասխանելով այն հարցին՝ ԲՀԿ համագումարում արդյո՞ք քննարկվել է ԲՀԿ-ի այլընտրանք մնալու կամ ընդդիմադիր հռչակվելու մասին հարցը:

Վարդան Օսկանյանը նշեց, որ երկիրը ծանր վիճակում է, և ԲՀԿ-ի նպատակն է լինել այլընտրանքային լուծումներ առաջարկող կուսակցություն և այդ լուծումների շուրջ համախմբել այն բոլոր ուժերին, որոնք ցանկանում են այդ խնդիրները լուծել: Ըստ նրա, ԲՀԿ-ն այդ համագումարով նոր փուլ է  թևակոխում,  ու դա պայմանավորված է երկրում ստեղծված իրավիճակով, ինչպես նաև խորհրդարանական 4 ուժերի համագործակցությամբ:

« Այն, ինչ հիմա ասվում է, դա ժողովրդի խնդիրներից է գալիս, դա սոսկ քննադատություն չէ:Բեկումնային իրավիճակ է, կամ երկիրը կգնա այս ճանապարհով եւ կկործանվի, կամ պետք է սթափվենք»,- ասաց նա՝ հավելելով, որ ոչ կոալիցիոն 4 ուժերի համագործակցության արդյուքնները կերևան մոտակա 4 ամիսների ընթացքում:

Այն հարցին, թե ինչո՞ւ ԲՀԿ-ն չի պահանջում Սերժ Սարգսյանի հրաժարականը, այլ միայն պահանջում է կառավարության հրաժարականը, Վարդան Օսկանյանը պատասխանեց, որ ոչինչ չեն բացառում, որովհետև իրենց հայտի է, թե ովքեր են երկրում ստեղծված վիճակի հիմնական պատասխանատուները, սակայն ունեն օրակարգ և շարժվում են քայլ առ քայլ, ըստ այդ օրակարգի:

«Այսօր օրակարգում կառավարության հրաժարականն է, որի շուրջ էլ ընդհանուր հայտարարի են եկել չորս քաղաքական ուժերը: Բայց մենք ոչինչ չենք բացառում»,- ասաց Վարդան Օսկանյանը: