Մարգարիտա Գրիգորյանը դասերին եկել ու չի եկել միաժամանակ

Արդեն տեղեկացրել ենք, որ «Ժողովուրդ» օրաթերթին էին դիմել Երևանի պետական համալսարանի լրագրության ֆակուլտետի մագիստրատուրայի 2-րդ կուրսի ուսանողները, ովքեր հայտնվել են անելանելի վիճակում։ Մարկետինգի և գովազդի հիմունքներ դասավանդող Մարգարիտա Գրիգորյանը, որը նաև Հանրային հեռուստաընկերության գործադիր տնօրենն է, համարվում է ՀՀ նախագահի նստավայրի հովանավորյալը, չի բարեհաճում գալ դասերին, ավելին` 2013թ. դեկտեմբերի 17-ին նշանակված քննությանը Մ. Գրիգորյանը չի ներկայացել, սակայն ուսանողների գրավոր քննության արդյունքները գնահատել է 2 միավորով։ Ու զավեշտալին այն է, որ նա 2 միավոր է նշանակել նաև կուրսի ավագ Ռիմա Ղազարյանին, որը 2013թ. նոյեմբերին հիվանդության պատճառով մահացել է։

Yerkir.am-ի հետ զրույցում ԵՊՀ հասարակայնության հետ կապերի եւ լրատվության վարչության պետ Կարեն Գրիգորյանը նշեց, որ դեռ հստակ տեղեկություն չունեն` քննություններին Մարգարիտա Գրիգորյանը ներկայացե՞լ է, թե՞ ոչ:

«Բոլորի գնահատականը երկուս չէ նշանակված, բոլորը նույնը չեն ստացել: Ֆակուլտետի դեկանից փորձեցինք պարզաբանումներ ստանալ, հիմա սպասում ենք պատասխանի, քանի որ ուսանողները հավաստիացնում են, թե մահացած ուսանողին էլ է գնահատական նշանակել»,- ասաց Գրիգորյանը:

Ինչ վերաբերում է ուսանողների պնդմանը, թե դասախոսը ամբողջ տարին դասերին չի ներկայացել, Գրիգորյանը նշեց, որ, ըստ դեկանատի ներկայացրած փաստաթղթերի, Մ. Գրիգորյանը դասերին մասնակցել է: