Սոցիալապես խոցելի խմբերի համար գազի սակագինը կմնա 100 դրամ

Կառավարության այսօրվա նիստում վարչապետ Տիգրան Սարգսյանն անդրադարձավ սոցիալապես խոցելի խմբերին կառավարության կողմից գազի գնի փոխհատուցման հարցին:

Նա նշեց, որ սոցիալապես խոցելի խմբերում ընդգրկված ընտանիքներին կառավարությունը կօժանդակի սպառած գազի դիմաց վճարելու հարցում` այդ ընտանիքների համար գազի գինը կհաշվարկվի մեկ խորանարդ մետրը 100 դրամով` մինչև 300 խորանարդ մետր գազի սպառման դեպքում:

«Անցյալ տարիներին գազի գինը կազմում էր 132 դրամ` մեկ խորանարդ մետրի դիմաց, և մենք փոխհատուցել ենք 32 դրամը: Հիմա գազի գինը մեկ խորանարդ մետրի դիմաց կազմում է 156 դրամ, և մենք շարունակում ենք փոխհատուցել 56 դրամը»,- ասաց վարչապետը:

Նա նաև հանձնարարեց էներգետիկայի եւ բնական պաշարների, ինչպես նաև աշխատանքի և սոցիալական հարցերի նախարարներին` պատրաստել համապատասխան որոշման նախագիծ, որպեսզի այն ներկայացվի կառավարության հաստատմանը, և կառավարությունը հնարավորություն ունենա օժանդակելու սոցիալապես խոցելի խմբերին, որպեսզի նրանց վրա գազի թանկացումը չազդի: Մեկ շաբաթվա ընթացքում պետք է ներկայացվի այդ որոշման նախագիծը: