Վարդան Պետրոսյանի փաստաբանի երկրորդ միջնորդությունը նույնպես մերժվեց

Այսօր Կոտայքի մարզի առաջին ատյանի ընդհանուր իրավասության դատարանը` դատավոր Յուրի Բաղդասարյանի նախագահությամբ, մերժեց դերասան Վարդան Պետրոսյանի փաստաբանի` դատավորին ինքնաբացարկ հայտնելու երկրորդ միջնորդությունը` պատճառաբանելով, որ այն անհիմն է: Այս մասին yerkir.am-ին հայտնեց Պետրոսյանի փաստաբան Նիկոլայ Բաղդասարյանը:

Այս անգամ Յուրի Բաղդասարյանին ինքնաբացարկ հայտնելու առիթը դատավորի` Վարդան Պետրոսյանին ձերբակալելու մասին որոշման բողոքարկման քննությունը դռնփակ կարգով անցկացնելն էր:

 «Դռնփակ նիստ կազմակերպելու անհրաժեշտություն չկար: Երևի թե պատճառն այն է եղել, որ ոչ ոք չիմանար, որ իրենք ուրիշ ապացույց չունեին, որ Վարդանին օրինական են ձերբակալել»,- ասաց փաստաբանը և հավելեց, որ այսօր մեղադրող կողմն իրենց բերած փաստարկների վերաբերյալ ապացույցներ պետք է ներկայացներ, և գործը դրանով ավարտվեր, սակայն դատավորը հետաձգել է նիստը:

Հաջորդ դատական նիստը նշանակվել է հունվարի 22-ին: