Շարմազանովը հույս ունի, որ 2014-ին Հայաստանը կդառնա ՄՄ անդամ

Այսօր ՀՀԿ փոխխոսնակ Էդուրադ Շարմազանովը, ամփոփիչ ասուլիսի ժամանակ պատասխանելով Yerkir.am-ի այն հարցին, թե ինչո՞ւ Սերժ Սարգսյանը շտապեց դեպի Մաքսային միություն և Ուկրաինայի օրինակով չսակարկեց` իր երկրի համար հնարավորինս շատ զիջումներ կորզելու համար, նաեւ ինչո՞ւ էին ռուս պաշտոնյաները հեգնում, թե Հայաստանն այնքան արագ է իրականացնում ՄՄ մտնելու գործընթացը, որ անգամ Հայաստանի հետևից չեն հասցնում, ասաց, որ համաձայն չէ, թե ռուս պաշտոնյաները հեգնում են Ըստ նրա` ընդհակառակը` վերջին իրադարձությունները ցույց տվեցին, որ սեպտեմբերի 3-ին Սերժ Սարգսյանի որոշումը տեղին էր, շահեկան ու ժամանակին Հայաստանի համար` ոչ ուշ, ոչ շուտ:

Ըստ Շարմազանովի` Սերժ Սարգսյանի քաղաքականության արդյունքում այսօր կա ստորագրված «ճանապարհային քարտեզ», ի տարբերություն որոշ երկրների: Նա նաև հույս հայտնեց, որ 2014-ի առաջին կիսամյակում ԱԺ-ն կքննարկի, ու Հայաստանը կդառնա ՄՄ անդամ:

«Եթե մարդկանց ուրախացնում է, որ Ուկրաինայում իրար ծեծում են, իրար դեմ են դուրս գալիս ու անկարգություններ են լինում, դա այդ մարդկանց կարծիքն է: Ես մի բան գիտեմ, որ պետության կայացման գրավականը կայունությունն ու խաղաղությունն է»,- ասաց Էդուարդ Շարմազանովը:

Նրա համոզված է, որ ՄՄ անդամակցությունը բխում է Հայաստանի տնտեսական շահերից: