Վարչական դատարանը մերժեց քաղաքապետարանի դեմ հայցը

ՀՀ վարչական դատարանը` դատավոր Ռաֆիկ Խանդանյանի նախագահությամբ,  մերժել է Սայաթ-Նովա 10 շենքի բնակիչ Անաիդա Հովսեփյանի հայցն ընդդեմ Երևանի քաղաքապետարանի:

Նշենք, որ հայցվորը պահանջում էր` պարտավորեցնել քաղաքապետարանին Սայաթ-Նովա 10/5 հասցեում կատարվող շինարարությունը դադարեցնելու համար միջոցներ ձեռնարկել և 17.07.2013թ. շինարարության թիվ 01/18-40225-683 թույլտվությունը ոչ իրավաչափ ճանաչել: Դատարանը, հայցվորի կողմից հայցադիմումում վկայակոչված փաստարկների ուսումնասիրության արդյունքում, արձանագրել է, որ 17.07.2013 թվականի թիվ 01/18-40225-683 շինարարության թույլտվությունը հանդիսանում է իրավաբանական ուժ ունեցող վարչական ակտ, քանի որ այն տրվել է 17.07.2013 թվականին 24 ամիս ժամկետով: Իսկ Անաիդա Հովսեփյանի կողմից չի ներկայացվել շինարարության թույլտվության` իրավաբանական ուժը կորցրած լինելու հանգամանքը հավաստող որևէ ապացույց:

Yerkir.am-ի հետ զրույցում Սայաթ-Նովա 10-ի բնակիչների փաստաբան Ալբերտ Կանդալյանը նշեց, որ երբ իրենք դիմել են քաղաքապետարան, օրենքով նախատեսված կարգով պատասխան պետք է ստանային 10 օրվա ընթացքում, սակայն դատարանը մերժել է` ասելով, որ օրենքով 30 օր է սահմանված, ոչ թե` 10:

Փաստաբանը հայտնեց, որ սպասում են դատական ակտին, ինչից հետո վարչական դատարանի վճիռը կբողոքարկեն ՀՀ Վերաքննիչ դատարանում: «Իմ կարծիքով` դատարանն իր վրայից քցեց, որ այդ որոշումն իր վրա չմնա»,- ասաց նա:

Ի դեպ, նույնաբովանդակ պահանջով դատարան է դիմել նաև նույն շենքի բնակիչ Սվետլանա Սարգսյանը, որիմ հայցադիմումի վերաբերյալ դատարանը դեռևս որոշում չի կայացրել: Նշենք, որ եթե դատարանը հայցադիմումն ընդունի վարույթ, շենքի մյուս բնակիչները գործում կներգրավվեն որպես 3-րդ անձ: